Nanawagan ang mga kaanak ng isang Pilipinong agriculturist na nasawi sa aksidente sa kalsada sa Tokyo, Japan noong Lunes, Nobyembre 24, na tulungan ng pamahalaan ang agarang pag-uwi sa kaniyang mga labi sa Barangay Batiocan sa Libungan, Cotabato para sa maayos na libing.
Ayon sa kapatid ng biktima na si Gladys Grace Testado, sinabi nila sa mga mamamahayag sa Cotabato City nitong Sabado, Nobyembre 29, na nasagasaan ito ng isang kotseng mabilis ang takbo habang nasa kahabaan ng highway sa Umejima sa Adachi Ward, Tokyo.
Tinamaan din umano ng parehong sasakyan ang isang commuter van at nasugatan ang siyam nitong pasahero.
Nagtapos si Testado ng apat na taong kursong agriculture sa state-run University of Southern Mindanao sa Kabacan, Cotabato.
'Focus crimes' sa bansa, bumaba ng 12.4% noong 2025
Ayon sa mga lokal na opisyal ng Libungan, bumiyahe si Testado papuntang Japan upang mag-aral ng wikang Nihongo bilang paghahanda sa balak niyang pagtrabaho sa Tokyo.
Ibinahagi rin ng mga kaibigan ng 28-anyos na si Testado sa Filipino community sa Japan sa kaniyang pamilya sa Barangay Batiocan—isang agricultural area sa Libungan, isa sa 17 bayan ng Cotabato province sa Region 12—na isang matandang Japanese man ang nasawi rin sa insidente.
Ayon sa mga Pilipino sa Tokyo na nagpadala ng impormasyon sa pamilya ni Testado sa pamamagitan ng Facebook Messenger, ang sasakyang sangkot sa aksidente ay umano’y ninakaw ng driver mula sa isang roadside commercial vehicle showroom sa Adachi Ward.
Sinabi ng kapatid ng biktima na si Geneva, 25, na binawian ng buhay si Testado sa intensive care unit ng isang ospital sa Tokyo noong Martes, isang araw matapos ang aksidente.
Dagdag ni Geneva, ipinaalam sa kanila ng mga kaibigan ng kanyang kapatid sa Japan na sinubukan umanong tumakas ng driver ng sasakyan ngunit nahuli rin at naaresto ng mga rumespondeng pulis sa Japan.
