Nag-uwi ang Filipino horror film ni Nadine Lustre na “Deleter” ng Best Scare Award sa Grimmfest 2023 sa United Kingdom.
Base sa kanilang website, inihayag ng Grimmfest na nanalo ang Deleter bilang Best Scare dahil sa “eerie,” “unsettling mood,” at “atmosphere” umano ng pelikula sa kabuuan.
“Always a hotly contested category as jurors debate what precisely constitutes a ‘scare’ and whether to select a traditional ‘jump scare’ or something more… intangible. In the case of DELETER, what impressed and stayed with the jury, rather than any one moment, was the eerie, unsettling mood and atmosphere of the film as a whole,” saad ng film festival.
Ang Grimmfest ay isa umanong independent genre film festival na nagfi-feature ng “horror, cult, extreme fantasy and sci-fi movies.”
‘Deleter’ star Nadine Lustre, wagi bilang best actress sa #MMFF2022 ‘Gabi ng Parangal’
Samantala, nag-post naman ang direktor ng Deleter na si Mikhail Red para ipagdiwang ang naiuwing karangalan ng kanilang pelikula.
“DELETER wins Best Scare award at @grimmfest 2023,” saad ng direktor sa kaniyang X post, bagay na ni-repost naman ni Nadine.
Matatandaang nauna nang humakot ng mga parangal ang Deleter sa Metro Manila Film Festival (MMFF) noong nakaraang taon.
Kabilang na sa mga naiuwi ng pelikula sa nagdaang MMFF ang “Best Sound,” “Best Editing,” “Best Cinematography,” “Best Visual Effects,” at “Best Picture” awards.
Nagwagi rin si Nadine bilang “Best Actress,” habang “Best Director” naman si Mikhail.
