Tinawag ni Presidential Communications Office (PCO) Undersecretary at Palace Press Officer Atty. Claire Castro na “basic” ang naging sagutan nina private prosecutor Atty. Lorna Kapunan at defense counsel Atty. Kristine Ferrer, hinggil sa isinagawang pagtatanong sa witness na si Commission on Audit (COA) auditor Xylene del Campo, sa ika-15 na araw ng impeachment trial ni Vice President Sara Duterte noong Miyerkules, Agosto 12.
Matatandaang nag-ugat ito nang kuwestiyunin ng depensa kung paano sumagot si Del Campo sa mga tanong na ipinupukol sa kaniya ng defense team.
Ani Atty. Ferrer, dapat na “yes” o “no” lang ang isagot ng nasabing testigo—na hindi naman sinang-ayunan ni Atty. Kapunan.
Nagkagirian din ang dalawa hinggil sa usapin ng pagiging “allowed” ng misleading questions sa cross-examination.
Ayon kay Atty. Ferrer, maaari daw ito; taliwas sa pahayag ni Atty. Kapunan kung saan idiniin niyang hindi ito puwede.
MAKI-BALITA: ‘I don’t think I need to lecture you that!' Kapunan, Ferrer nagkagirian dahil sa 'misleading question'-Balita
“As a lawyer, basic. This is so basic. Misleading questions are not allowed, especially during cross-examination,” saad ni Usec. Castro sa ikinasang press briefing ng PCO nitong Huwebes, Agosto 13.
Paliwanag niya, “Bakit? Kasi if you will ask misleading questions, and you will just demand an answer na yes or no, nothing more, nothing less, it will definitely give also a wrong answer.”
“Sanay na sanay na nga tayo sa fake news, pati ba naman sa hearing, magkakaroon pa ng fake news? So, hindi po allowed ang misleading questions, kasi para mong niloloko ‘yong witness mo, at pipilitin mong sumagot na oo o hindi,” dagdag pa niya.
Natanong din ang press officer kung sa tingin niya ba ay bahagi ito ng estratehiya ng defense team.
“Ayoko mag-judge, ayoko mag-judge sa style ng mga lawyer—so, respeto ko na lang sa kanila ‘yon,” anang press officer.
