Inanunsyo ng Department of National Defense (DND) nitong Martes, Hulyo 21, na si Philippine Army Commanding General Lt. Gen. Antonio G. Nafarrete ang nakatakdang humalili kay General Romeo S. Brawner Jr. bilang bagong Chief of Staff ng Armed Forces of the Philippines (AFP).

Ayon sa DND, ang pagpili kay Nafarrete ay kasunod ng retirement ni Brawner ngayong araw matapos itong manilbihan ng tatlong taon sa AFP.

“The Department of National Defense, upon the authority of President Ferdinand R. Marcos, Jr., announces the appointment of Lieutenant General Antonio G Nafarrete as the incoming Chief of Staff of the Armed Forces of the Philippines (AFP), following the retirement of General Romeo S Brawner Jr, today,” saad ng DND sa kanilang anunsyo.

Dahil sa magiging panibagong posisyon ni Nafarrete, papalit na sa kaniyang posisyon bilang Commander General ng Philippine Army si Lieutenant General Donald M. Gumiran—na sa kasalukuyan ay ang Commander ng Western Mindanao Command.

“The DND congratulates Lieutenant General Nafarrete and Lieutenant General Gumiran on their appointments and looks forward to their leadership in upholding professionalism, excellence, and dedicated service to the Filipino people,” saad pa ng ahensya.

Matatandaang isinawalat kamakailan ni Palace Press Officer at Presidential Communications Office (PCO) Undersecretary Atty. Claire Castro ang aniya’y “non-negotiable qualities” na nais ni Pangulong Ferdinand “Bongbong” Marcos, Jr. pagdating sa magiging bagong hepe ng AFP.

“Unang-una po, of course, mapagkakatiwalaan, makabayan, maka-Diyos, masipag, at ang iniisip ay kapakanan ng bayan,” saad ni Usec. Castro sa kaniyang press briefing kamakailan.

MAKI-BALITA: Nais ni PBBM sa susunod na AFP chief: 'Mapagkakatiwalaan, Makabayan, Maka-Diyos'-Balita