Ipinagdiinan ni Mamamayang Liberal (ML) Party-list Rep. Atty. Leila de Lima ang aniya’y pagpapatuloy sa trabaho at laban, kasunod ang pagpapalit ng liderato sa Senado nitong Miyerkules, Hunyo 17.

Kasunod ito ng opisyal na pagbakante ni Sen. Alan Peter Cayetano sa Senate President (SP) position; at pormal namang pagkakaluklok kay Sen. Sherwin Gatchalian bilang bagong Pangulo ng Senado, na nauna nang nagsilbi bilang Acting SP at Senate President Pro Tempore.

Sa isang Facebook post na ibinahagi ni Rep. De Lima nito ring Miyerkules, Hunyo 17, idiniin at binanggit niya ang aniya’y mga isyung dapat pagtuunan ng pansin matapos ang naganap na pagbabago sa Senate leadership—partikular na ang impeachment trial ni Vice President Sara Duterte, at ang ilang legislative measures na nais ipaprayoridad ni Pangulong Ferdinand “Bongbong” Marcos, Jr.

KAUGNAY NA BALITA: PBBM, nagpatawag ng Congress special session sa Hunyo 17-Balita

“With the Senate leadership issue now settled, we expect the impeachment trial to proceed unhampered,” saad ni De Lima.

Aniya, “We can now also focus on the important duty of Congress, especially the enactment of meaningful and responsive legislative measures.”

Anang kongresista, ang pagpapatuloy ng trabaho at laban ay para sa katotohanan, pananagutan, at serbisyo sa taumbayan.

“Tuloy ang trabaho at ang laban natin, hindi para sa pansariling interes, kundi para sa katotohanan, pananagutan at makabuluhang serbisyo para sa ating mga kababayan,” anang kongresista.

Hinalal si Gatchalian bilang bagong SP matapos kumpletuhin ni Sen. Joel Villanuela ang 13 senador ng kasalukuyang Senate majority bloc.