Binuweltahan ni Sen. Alan Peter Cayetano ang mga usapin kaugnay sa umano’y pagbabawal sa resource persons na dumalo sa mga pagdinig na isasagawa sa Mataas na Kapulungan.
Sa Facebook live na isinagawa ni Sen. Alan nitong Huwebes, Hunyo 4, kinuwestiyon niya kung bawal daw ba silang magkaroon ng mga bisita sa loob ng Senate premises.
“Bakit nga hindi? Kayo ang nasa media, martial law ba tayo ngayon? Bawal ba magkaroon ng guest?” saad ni Sen. Cayetano.
Aniya, “So, kung hindi nila ire-recognize ang blue ribbon committee, bawal kami magkabisita dito?”
“Ang may kontrol ng Senate premises is the Senate President, that is in the rules, hindi po ang OSAA or kung sinuman,” giit pa niya.
Idiniin din ni Sen. Cayetano na siya pa rin ang kasalukuyang pangulo ng Senado, kasama na ang pagbanggit na si Sen. Loren Legarda pa rin ang aniya’y Senate President Pro Tempore.
Taliwas ito sa quorum noong Miyerkules, Hunyo 3, kung saan itinalaga na si Sen. Win Gatchalian bilang bagong acting Senate President at Senate President Pro Tempore.
Kaugnay nito, nabago na rin ang Senate chairmanships, kabilang na ang Blue Ribbon Committee na pangungunahan na ni Sen. Erwin Tulfo.
Matatandaang iginiit naman ng nabanggit na mambabatas sa kaniyang media briefing noon ding Miyerkules, Hunyo 3, na hindi siya sang-ayon sa pagpapatawag ng resource persons.
Aniya, nararapat daw munang tingnan o i-review kung talagang may sasabihin ang mga ito.
“Now, pertaining to those invited resource persons, hindi po ako sang-ayon because we have to review these people. May sasabihin po ba talaga? Mayroon po bang idi-disclose? We have to review this,” anang mambabatas.
“Number 2, the proper way to invite resource persons, you do not give it out to the media—you give it to the members first. Ang nangyari po kanina, ‘yong listahan na sinasabi nilang invited sa blue ribbon [committee hearing], hindi po dumaan sa tamang process,” diin pa ni Sen. Erwin.
MAKI-BALITA: Blue ribbon committee hearing, ikakasa sa Hunyo 8—Sen. Erwin-Balita
