Posibleng maglabas si Pangulong Ferdinand “Bongbong” Marcos Jr.,ng kautusan upang suspindihin o bawasan ang excise tax sa mga produktong petrolyo sa Abril 12 o 13, 2026, ayon sa isang opisyal ng Department of Finance (DOF) sa pagdinig ng Senado nitong Huwebes, Marso 26.

Ang DOF ay bahagi ng Development Budget Coordination Committee (DBCC) na inatasang magrekomenda sa pangulo kaugnay ng pagsuspinde o pagbawas ng buwis alinsunod sa bagong batas na Republic Act No. 12316.

“In terms of the timeline, there is the 15-day period (after completion of) publication and effectivity. So the earliest that the president can issue the EO (executive order) is around April 12 or 13, if I’m not mistaken with my numbers,” ayon kay DOF Undersecretary Karlo Adriano sa pagdinig ng Senate Proactive Response and Oversight for Timely and Effective Crisis Strategy committee.

Noong Miyerkules, Marso 25, nilagdaan ni PBBM ang batas na nagbibigay kapangyarihan sa kanya na suspindihin o bawasan ang excise tax sa mga produktong petrolyo.

Gayunman, nakasaad sa batas ang dalawang kondisyon bago ito ipatupad: kapag umabot o lumagpas sa $80 kada bariles ang average na presyo ng Dubai crude oil batay sa Mean of Platts Singapore sa loob ng isang buwan, at kung may rekomendasyon mula sa DBCC.

Sey ng NBI: 'Fugitive Senator Dela Rosa will be arrested whether he likes it or not'

Nakasaad din na ang anumang suspensyon o pagbabawas ng buwis ay maaaring tumagal ng hanggang tatlong buwan lamang.

“Provided, the power of the President to temporarily suspend or reduce the excise tax on petroleum products granted under this Section shall be exercised only until December 31, 2028,” anang batas.

Samantala, inaatasan din ang mga kumpanya ng langis na magsumite ng buwanang ulat sa DOE hinggil sa cost components ng kanilang mga produktong ibinebenta habang umiiral ang suspensyon.

Batay sa datos ng DOE, posibleng umabot sa mahigit ₱130 kada litro ang diesel at lampas ₱100 kada litro ang gasolina sa huling linggo ng Marso, bunsod ng sunod-sunod na pagtaas ng presyo dulot ng tensyon sa Middle East.

KAUGNAY NA BALITA: PBBM, pirmado na batas na magsususpinde sa fuel excise tax!