Kwelang nagbihis bilang “Presidente Ganda” si Joey de Leon sa noontime variety show na “Eat Bulaga” habang binati pa niya rito ang kaniya raw “Vice” at loves na si “Ion.”
Sa birthday celebration episode ni Vic Sotto sa Eat Bulaga nitong Sabado, Abril 20, lumabas si Joey suot ang kaniyang blonde wig at pink na pink na dress habang ini-introduce ang sarili bilang si “Precy,” short for “Presidente Ganda.”
"Ang pangalan ko po ay Precy, short for Presidente. Presidente Ganda, okay?” kwelang pagpapakilala ni Joey.
“Nais ko lang batiin ang aking Vice, hi! Hello, Presidente Ganda reporting,” sundot pa niya.
Joey De Leon sa nagsasabing kaaway sa ‘It’s Showtime’: Huwag n’yo kaming pagsabungin
Binati rin ng comedy-host sa show ang “loves” daw niya na nagngangalang “Ion.”
"Ay, batiin ko rin 'yung loves ko, si Ion.”
"Sinong Ion?" pag-usisa naman ng co-host niyang si Allan K.
"Ion Veneracion, sino ba?" sagot naman ni Joey. “Noong past life namin anak ko ‘yun. Ngayon, love team na kami.”
Ang naturang pag-akto ni Joey bilang “Presidente Ganda” ay matapos niyang linawin kamakailan na hindi raw nila kaaway ang katapat nilang noontime show na “It’s Showtime” kung saan main host si “Vice Ganda.”
