Noong Hunyo 30 ang unang taon sa panunungkulan ni Pangulong Ferdinand R. Marcos Jr. matapos iboto ng mahigit 31 milyong Pilipino.
Walang honeymoon phase para sa Pangulo dahil kailangang simulan agad ang trabaho. Kinailangan niyang tiyakin ang malakas na pagbangon mula sa pandemya ng Covid-19 at kinailangan niyang protektahan ang ekonomiya mula sa epekto ng mga pandaigdigang isyu na lubhang nakakaapekto sa presyo ng mga lokal na bilihin.
Sinabi mismo ng Pangulo na marami pang dapat gawin para matupad ang kanyang mga pangako noong kampanya. Halimbawa, kailangang punan ng kanyang administrasyon ang mga dekada ng kapabayaan sa sektor ng agrikultura.
Prayoridad ng Pangulo ang agrikultura. Ang kanyang pag-upo bilang kalihim ng agrikultura ay isang malinaw na indikasyon na seryosos siyang matugunan ang mga problema sa sektor at makamit ang seguridad sa pagkain.
Agusan del Sur, nilindol ng magnitude 5.3
Isa sa mga programa niya para dito ay ang Kadiwa ng Pangulo na naglalayong tugunan ang inflation sa pamamagitan ng pagbibigay sa publiko ng abot-kaya at de-kalidad na mga produkto. Ang mga produktong tulad ng bigas sa halagang Php25 kada kilo, isda, manok at hayop, prutas at gulay, at iba pang pangunahing bilihin ay ginagawang accessible at abot-kaya sa mga Pilipino, lalo na ang mahihirap na pamilya. Kung posible ang pagkakaroon ng Php25 kada kilo ng bigas, ang layunin na magkaroon ng Php20 kada kilo ng bigas ay posible rin.
Mayroong higit sa 300 na mga Kadiwa center sa bansa, at ang pangako ng Pangulo ay magtatag ng mas marami pa upang matulungan ang mga local producer na kumita ng mas mataas habang nagbibigay sa mga mamimili ng mga produkto sa mas mababang halaga.
Gayunpaman, upang mapanatili ang mga operasyon ng Kadiwa, kailangang dagdagan ang produksyon ng lahat ng mga produktong pang-agrikultura. Kaya naman ipinapatupad ng gobyerno ang konsepto ng ‘vertical integration’ para tugunan ang mga isyu sa sektor ng agrikultura, kabilang ang hoarding at smuggling ng mga produktong pang-agrikultura.
Nagtatag din ang Pangulo ng mga makabuluhang reporma sa kanyang unang taon sa panunungkulan. Sa kanyang mga official trip sa ibang bansa, naglalaan siya ng panahon para sa mga Filipino community upang parangalan sila sa kanilang mga kontribusyon sa bansa at upang bigyan sila ng katiyakan na ang gobyerno ay nagsusumikap na protektahan ang kanilang mga interes.
Sa kanyang mga pagpupulong sa mga dayuhang kumpanya, nakakakuha ang Pangulo ng mga investment para sa bansa. Halimbawa, sa kanyang pagbisita sa China, bukod sa paglagda ng 14 na bilateral na kasunduan, nakakuha ang Pangulo ng mga investment pledge para sa bansa mula sa mga negosyanteng Tsino na nagkakahalaga ng USD 22.8 bilyon.
Sa ASEAN-EU Commemorative Summit sa Brussels, nakipagpulong ang Pangulo sa mga business leaders mula sa iba't ibang European companies at nakakuha ng P9.8 bilyong halaga ng investment pledges.
Samantala, ang kanyang opisyal na pagbisita sa US ay nakabuo ng mahigit USD 1.3 bilyon sa investment pledges na may potensyal na lumikha ng humigit-kumulang 6,700 bagong trabaho para sa mga Pilipino.
Ang lahat ng pamumuhunang ito ay mangangahulugan ng mas maraming oportunidad sa trabaho para sa mga Pilipino.
Binigyang-diin ng Pangulo ang pangangailangang lumikha ng mas maraming trabaho at oportunidad sa kabuhayan upang makabangon mula sa pandemya. Dahil dito patuloy na bumababa ang unemployment rate ng bansa. Sa pinakahuling Labor Force Survey ng Philippine Statistics Authority (PSA), bumaba ang unemployment rate sa 4.5 percent noong Abril 2023, mula sa 5.7 percent sa parehong buwan noong nakaraang taon. Noong Enero 2023, ang unemployment rate ay 4.8 percent.
Samantala, isinusulong din ng administrasyong Marcos ang pagpapatupad ng mga kritikal na proyekto sa imprastraktura upang matiyak ang pagkakaugnay ng mga pangunahing kalsada at expressway, at magtayo ng mga kinakailangang kalsada at tulay sa mga estratehikong lugar sa buong bansa.
Inaprubahan ng Pangulo ang 194 high-impact priority projects bilang bahagi ng Build Better More program ng gobyerno. Ito ay mga bagong proyekto gayundin ang mga mula sa nakaraang administrasyon.
Marami pang kailangang gawin upang makamit ang layunin ng isang ‘matatag, maginhawa, at panatag na buhay’ para sa lahat ng Pilipino. Inilatag na ng administrasyong Marcos ang plano para dito, ngunit kailangan nating lahat na makipagtulungan sa Pangulo, magtulungan ang buong gobyerno at lipunan upang makamit ang isang maunlad, inklusibo at matatag na lipunan.
