MATINDI ang direktiba ni Pangulong Duterte sa mga tauhan ng iba’t ibang departamento ng pamahalaan, kabilang na ang government owned and controlled corporations (GOCC): magtulong-tulong upang mahadlangan ang paglaganap ng African Swine Fever (ASF) sa mga babuyan sa buong kapuluan. Natitiyak ko na ang kanyang utos ay nakatuon sa private sector, kabilang na rin ang local government units (LGUs), lalo na kung isasaalang-alang na ang halos lahat ng piggery sa bansa ay pag-aari ng mga pribadong hog raisers; pakay ng naturang direktiba na pawiin ang mga pangamba ng sambayanan sa panganib na maaaring ihatid ng nasabing sakit ng mga baboy.

Halos kasunod ng direktiba ng Pangulo, iniutos din ni Secretary William Dar ng Department of Agriculture (DA) ang pagpapasuri sa mga processed food upang matiyak kung ang mga ito ay nahawahan o nagtataglay ng ASF virus. Ang naturang aksiyon ay pinaniniwalaan kong nakaangkla sa natuklasang ASF virus sa balde-baldeng longganisa at tocino na ibiniyahe sa Oriental Mindoro port kamakailan. Ang nasabing mga kargamento na sinasabing nagbuhat sa Central Luzon ay maaring ipamamahagi at ipagbibili sa nasabing lalawigan.

Naniniwala ako na layunin din ng utos ni Dar na pawiin ang agam-agam ng taumbayan hinggil sa tila patuloy na paglaganap ng ASF virus. Sa pagpapasuri ng mga processed foods, magiging katuwang ng DA -- sa pamamagitan ng Bureau of Animal Industry (BAI) --ang Food and Drug Administration (FDA), ang ahensiya na may sapat na kaalaman at kakayahan sa pagsusuri ng nasabing mga produkto, at maging ng mga gamot, upang matiyak kung ang mga ito ay nagtataglay ng mga elemento na tulad nga ng ASF virus. Bagamat hindi tuwirang binanggit, ang nasabing mga produkto ay maaaring ipadala rin sa Europa upang mabatid natin ang hindi mapagdududahang resulta.

Bilang pagtalima sa direktiba ng Pangulo, isa ring pampapawi ng agam-agam ang ibinunsod sa aming lalawigan sa Nueva Ecija. Sa pangunguna ni Gob. Aurelio Umali, isang boodle fight ang isinagawa sa kapitolyo ng lalawigan sa Palayan City; dinaluhan ito ng aming mga kababayan mula sa iba’t ibang sektor; lalo na ng ating mga kababayang magsasaka at hog raisers. Isa itong okasyon na naghuhudyat na ang lalawigan ay maituturing nang isang ASF-free.

Tulad ng iba pang opisyal ng LGUs naniniwala ako na hangad ng aming mga pinuno na makipagtulungan sa iba’t ibang sektor upang mahadlangan ang paglaganap ng ASF virus. Dapat lamang, sapagkat talagang marapat pangalagaan ang 265 billion peso hog industry, lalo na ang 12.7 milyong baboy na inaalagaan ng malalaking hog raisers, kabilang na ang mga may-ari ng backyard piggerry.

Ang pagpawi ng mga pangamba at agam-agam sa ASF virus ay makatutulong sa ibayong pagpapaunlad ng ating hog industry.