KUALA LUMPUR, Malaysia – Nakamit ni Calabarzon’s sprint queen Jessel Lumapas ang ikalawang gintong medalya at ikalima para sa matikas na kampanya ng Team Philippines sa 2018 ASEAN School Games nitong Lunes sa Mini-Stadium ng Bukit Jalil.

Nahiritan ni Lumapas, Grade 11 student ng Nazareth School of National University, ang mga karibal sa girls 200-meter run sa tyempong 25.03 segundo para tanghaling unang Pinoy double gold winner sa taunang torneo para sa mga student-athletes sa rehiyon.

Nauna niyang nadomina ang 400-m run nitong Linggo sa tyempong 57.46 segundo.

Pumangalawa ang kasangga niyang si Decerie Jane Niala (25.07) kasunod si Nuryanti Erna ng Indonesia (25.25).

Another gold! Hidilyn Diaz, isa nang guro sa UP Diliman

Target ng 17-anyos na si Lumapas, pambato ng Dasmarinas City, Cavite, ang ikatlong medalya sa pagsabak niya sa 4x400m event Martes ng hapon.

“Tingnan ko lang po. Kakayanin naman namin ng teammates ko. May tiwala naman ako sa kanila,” pahayag ni Lumapas.

Sa pangangasiwa ni coach Fernando Dagasdas, nakapagsanay ng todo si Lumapas para sa kanyang unang sabak sa international competition, at inialay ang panalo sa kanyang magulang.

“These medals are for them,” aniya.

Nakamit naman nina Tara O. Borlain at Bernalyn Bejoy ang silver at bronze, ayon sa pagkakasunod sa likod nang nagwaging si Ngo Thi Khanh Ny ng Vietnam (13.90 segundo) sa 800-meter run.

Naorasan sina Borlain (2:15.54) at Bejoy (2:17.51), ayon sa pagkakasunod.

Sa gymnastics event, nasungkit ni Justine Ace de Leon ang silver medal sa boys artistic gymnastics’ vault event sa nakopong ikor na 13.533 puntos, sa likod ni gold medalist Trinh Hai Khang ng Vietnam (13.717).

Nakamit naman ni Althea Descutido ang bronze medal sa clubs event ng girls rhythmic gymnastics.

Tangan ng Team Philippines ang limang ginto, limang silver at 10 bronze medals sa kasalukuyan para sa ika-anim na puwesto.