TATLUMPU’T SIYAM na kuweba sa buong bansa ang isinailalim sa pangangalaga at pamamahala ng gobyerno, kinumpirma ng Department of Environment and Natural Resources (DENR), ayon sa ulat ng Philippines News Agency (PNA).
Kinilala ng DENR ang karagdagang 39 na kuweba, dahilan upang umabot na sa 454 ang kabuuang bilang ng kuweba at yamang-likas ang nasa ilalim ng pamamahala ng gobyerno.
“The directive will help enhance public awareness and appreciation that caves are part of our natural resources because of their significance as ecosystems which host various forms of wildlife,” ayon kay DENR Secretary Ramon J.P. Paje.
Ayon pa kay Paje, “It also helps protect the geological, archaeological, historical and cultural values these caves carry, and helps sustain them for the enjoyment of future generations.”
Ang 39 na kuweba ay matatagpuan sa mga sumusunod na lugar: 6 na kuweba sa Cordillera Administrative Region; 7 kuweba sa Ilocos Region; 2 sa Cagayan Region; 15 sa Bicol; 3 sa probinsiya ng Davao del Norte; at 6 sa Region 12 o SOCCKSKARGEN.
May siyam na kuweba ay kabilang sa Class I dahil sa delikado at malalambot na formation. Limitado ang mga aktibidad na maaaring gawin gaya ng pagkuha ng litrato at pagsasagawa ng educational tour.
Ilan sa mga kuweba na kabilang sa Class I ay ang Karilagan at Aswang caves sa Catanduanes, at ang Kasilac Bat Cave sa San Isidro, Davao del Norte.
Aabot naman sa 23 kuweba ang pasok sa Class II, kabilang na rito ang Sorolla Cave sa Koronadal City. Ang mga kuwebang nakapailalim sa Class II ay ang mga may mapanganib na kondisyon at sensitibo. Ang ilan sa mga parte nito ay sarado sa publiko, habang ang ibang parte naman ng kuweba ay maaaring masilayan.
Ang pitong kuweba, kabilang na ang Dalangin Cave sa Camarines Sur at ang Sibud-Sibud Cave sa Abra, ay pasok naman sa Class III o ‘yong mga ligtas para bisitahin ng mga turista, ngunit siyempre, kinakailangan pa ring antabayanan ang mga dumadayong turista.
