PANTABANGAN, Nueva Ecija — Malubhang nasugatan ang 17 katao makaraang suyurin ng rumaragasang pampasaherong bus ang isang truck sa Pantabangan-Aurora Road sa Purok 7, Barangay Ganduz sa bayang ito, kamakalawa ng hapon.
Ayon sa Pantabangan Police, ang D’Liner bus, na may plakang CWM-855, ay minamaneho ni Carly Parocha y Ogues, 45, ng Bgy. Asin, Nangalisan, Tuba, Benguet. Samantala, ang green Isuzu truck, na may plakang GJK-943, ay minamaneho ni Roland Corpuz Domingo, 35, ng Bgy. San Andres, Balungao, Pangasinan.
Dinala ang mga nasugatang pasahero, kabilang na ang dalawang driver, sa Dr. Paulino J. Garcia Memorial Research & Medical Center (PJGMRMC) sa Cabanatuan City.
Sa pagsisiyasat ni PO3 Noel Villajuan, dakong 1:34 ng hapon nang okupahin ng bus ang kanang lane na humantong sa banggaan.
