Isinailalim kahapon sa inquest proceedings ang piskal na nahuli ng National Bureau of Investigation (NBI) sa isang entrapment operation sa Quezon City.
Si Assistant City Prosecutor Raul Desembrana, ng Quezon City Prosecutor’s Office, ay naaresto ng NBI bandang 11:00 ng umaga sa loob ng isang restaurant sa Quezon Memorial Circle matapos tanggapin ang P80,000 cash mula sa isang abogado na may kliyenteng nahaharap sa kasong unjust vexation.
Ayon kay Prosecutor General Claro Arellano, kasong direct bribery o paglabag sa Article 210 ng Revised Penal Code at paglabag sa Anti Graft and Corrupt Practices Act, ang kahaharapin ni Desembrana.
Sa Office of the Ombudsman ihahain ang kaso pero sa ngayon ay nasa tanggapan ng NBI ang naarestong piskal para sa kaukulang proseso na kailangang pagdaanan.
