“Back to zero po kami!”
Ito ang iniinda ng Pampanga Pottery and Agritourism Park sa Sto. Tomas, Pampanga matapos malubog sa baha ang kanilang shop dahil sa walang humpay na matinding pag-ulan dulot ng Habagat.
Mababasa sa isa sa Facebook posts ng Pampanga pottery noong Sabado, Agosto 23, na dahil sa trahedyang ito, na-wash out ang lahat ng kanilang pinagpagurang mga pangkabuhayan.
“Wala na talaga. Ma-wa-wash out na lang lahat ng pinagpaguran namin,” dismayadong saad ng shop.
Dagdag pa nila, “Wala naman kaming choice. Gagalingan na lang para makabangon.”
Banda sa Pampanga, tumugtog sa lagpas-tuhod na baha: 'Ikulong na yan mga kurakot!'
Sa comment section ng naturang post, ibinahagi rin ng shop na kinailangan nang umalis ng mga manggagawa nila sa shop dahil ibinaba na ng Pampanga local government unit (LGU) ang direktibang “forced evacuation” para matiyak ang kaligtasan ng bawat mamamayan.
“Pasensya kahit gusto ko maging positive, hindi kaya. Forced evacuation na kasi masisira na ang dike na dapat po-protekta samin. Para kaming naghihintay na lang ng lamunin ng flash flood yung farm,” saad ng shop.
Sa eksklusibong panayam ng Balita sa may-ari ng Pampanga Pottery na si Precious, ibinahagi niyang 22 araw nang lubog sa baha ang kanilang shop at kasama sa mga binahang kagamitan nila ay ang mga ginawa nilang paso, gayundin ang mga sasakyan nila.
Paglilinaw ni Precious sa publiko at pamahalaan, hindi sila humihingi ng ayuda ngunit gusto lamang nilang mamuhay ng normal dahil may mga pamilyang umaasa sa itinaguyod nilang negosyo.
“Hindi po namin kailangan ng ayuda. Gusto lang po namin mamuhay ng normal, yung hindi kailangang mag back to zero taon taon. May mga umaasang pamilya po sa aming maliit na negosyo,” saad ni Precious.
Dagdag pa niya, “Alam po namin na makakabangon po kami ulit, tatawaging resilient, pero napapagod din po kami.”
Hiling din ni Precious para sa shop, maraming bumalik na bisita sa shop nila pagbuti ng panahon dahil aniya, malaking tulong ito para sa muling pagbango nila bilang negosyo.
“Gusto lang po sana namin na bumisita sila [mga bisita] dito samin kapag umokay na [ang panahon]. Malaking tulong na po yun sa amin lalo na sa mga pamilya na naka asa samin ngayon,” kahilingan ni Precious.
