Inanunsyo ng Department of Labor and Employment (DOLE) - Davao Region nitong Biyernes, Agosto 28, na epektibo na sa darating na Martes, Setyembre 1, ang ikalawang tranche ng minimum wage increase para sa mga manggagawang nasa pribadong sektor sa rehiyon.
Base sa anunsyo ng DOLE - Davao Region, nakabatay ang taas-sahod sa Wage Order No. RB XI-24.
Sa nasabing order, tataas na sa ₱525 ang daily minimum wage ng mga manggagawa sa ilalim ng agriculture sector, mula sa ₱515.
Para naman sa mga nasa non-agriculture sector, aangat ang kanilang arawang sahod sa ₱540, mula sa ₱525.
Hinikayat naman ni DOLE XI Regional Director at Regional Tripartite Wages and Productivity Board (RTWPB) XI Chairperson Atty. Dax B. Villaruel ang mga employer na ipatupad ang nasabing wage order, bilang pagkilala at pagrespeto sa karapatan ng mga manggagawa, gayundin sa kanilang ambag sa negosyo.
Davao City government, nag-aasam makapagtayo ng data center para sa AI
“Employers are encouraged to implement the mandated wage adjustments as a concrete expression of respect for workers’ rights and recognition of their valuable contributions to the enterprise. Compliance with fair labor standards not only promotes the welfare of workers but also helps sustain industrial peace, productivity, and a healthy working environment,” saad ni Villaruel sa kaniyang pahayag.
Nilinaw naman ng DOLE XI na ang Barangay Micro Business Enterprises (BMBEs) na mayroong balidong Certificates of Authority na inisyu ng Department of Trade and Industry (DTI) ay hindi saklaw ng nabanggit na wage order, ayon sa Republic Act No. 9178, o ang Barangay Micro Business Enterprises Act of 2002.
Matatandaang ikinasa ang unang tranche ng taas-sahod noong Marso 13, 2026.
