Usap-usapan ng Pinoy netizens ang pagiging bahagi ni dating Chief Presidential Legal Counsel Atty. Salvador "Sal" Panelo ng selection committee sa ginanap na coronation night ng Miss Universe Pakistan 2026, noong Miyerkules, Agosto 18.
Mababasa sa opisyal na Facebook page ng prestihiyosong beauty pageant ang pagpapakilala nila kay Panelo bilang miyembro ng selection panel.
"We are honored to welcome Atty. Salvador “Sal” Panelo to the Miss Universe Pakistan 2026 Selection Committee!" mababasa sa post.
Sa pagpapatuloy, "A distinguished lawyer, former Chief Presidential Legal Counsel, and respected public figure, Atty. Panelo brings decades of experience, wisdom, and a keen eye for character and excellence to the search for the next Miss Universe Pakistan."
"As our candidates step onto the stage, he will be among the distinguished personalities entrusted to help choose the woman who will represent Pakistan on the global stage," anila.
Kapamilya, Kapuso, Kapatid: Vice Ganda, tinaguriang ‘Queen of All Networks!'
Bukod kay Panelo, dalawang Pilipino pa ang napabilang sa selection committee. Ito ay sina dating "Pinoy Big Brother 737" 4th Teen Big Placer na si Bailey May na ipinakilala bilang " international recording artist, actor, and performer," gayundin si Miss World Philippines 2022 Gwendolyne Fourniol.
Hindi naman makikita sa social media platforms ni Panelo kung kumpirmadong nakadalo siya sa nabanggit na event.
Samantala, itinanghal na Miss Universe Pakistan 2026 si Misbah Arshad ng Lahore, Punjab!
Siya ang kakatawan sa Pakistan sa Miss Universe 2026 pageant na gaganapin sa Puerto Rico sa darating na Nobyembre.
