Bumulaga sa isang fire volunteer ang natupok nilang tahanan matapos madamay ang kanilang tirahan sa sunog na sinaklolohan nila sa Barangay Gen. T. de Leon, nitong madaling araw ng Lunes, Agosto 17, 2026.
Sa panayam sa kaniya ng media, makailang beses umano siyang nagdadasal habang patungo ang kanilang grupo sa kanilang lugar upang rumesponde. Aniya, paulit-ulit daw niyang hinihiling na huwag madamay ang kanilang tahanan.
Subalit pagdating umano nila sa lugar, ilang mga kapitbahay na ang sumalubong sa kaniya at iginiit na natupok na ng apoy ang dalawang palapag nilang tahanan.
"Wala na po. Ubos na po yung bahay namin," saad niya sa media.
Ilang beses na umano siyang rumesponde at tumulong sa kanyang kapwa bilang fire volunteer. Ngunit sa pagkakataong ito, nakita niyang unti-unting nilalamon ng apoy ang lugar na tinatawag niyang tahanan.
LTO personnel, sangkot sa hit-and-run sa Antipolo; nakabangga ng pedestrian!
Dagdag pa niya, "Napakasakit sa part na ikaw mismo, fire volunteer, ang nasunugan."
Samantala, nagpapasalamat na lang daw siyang ligtas at walang nasaktan sa kaniyang pamilya lalo na sa mga anak niya.
Kasama sa mga natupok ng apoy ang lahat ng kanilang gamit sa loob ng bahay at wala rin silang naisalba na kahit ano.
Sa kabila nito, determinado ang naturang fire volunteer na makakabangon silang muli at magpapatuloy pa rin daw siyang magseserbisyo sa kanilang komunidad.
