Nagbabala ang Our Lady of Lourdes Parish sa Polomolok, South Cotabato sa publiko laban sa isang indibidwal na umano’y nanghihingi ng donasyon gamit ang pangalan ng simbahan.
Sa pamamagitan ng advisory, hinimok ng parokya ang mga parishioner at iba pang residente na maging maingat sa mga taong nag-aalok o nanghihingi ng kontribusyon sa ngalan ng simbahan.
Ayon sa parokya, isang indibidwal umano ang nagtungo sa isang bahay at nanghingi ng donasyon habang ginagamit ang pangalan ng Our Lady of Lourdes Parish.
Nakunan umano ng CCTV camera sa naturang bahay ang larawan ng sinasabing nanghingi ng donasyon. Iniulat naman ang insidente sa Parish Office.
Sinabi ng simbahan na inilabas ang naturang larawan nang may pahintulot ng may-ari nito upang magsilbing babala sa mga parishioner at publiko.
Water level ng Angat Dam, patuloy sa pagtaas!
Nilinaw din ng parokya na wala itong kasalukuyang opisyal na solicitation o donation drive.
Binigyang-diin din nito na walang pari na kasalukuyang inoordinahan sa ilalim ng Diocese of Marbel, kaya dapat maging mapanuri ang publiko sa mga kahilingan para sa donasyon na may kaugnayan umano sa isang ordinasyon.
Hindi lamang personal na panghihingi ng pera ang saklaw ng babala. Hinikayat din ng simbahan ang publiko na mag-ingat sa mga kahina-hinalang mensahe, tawag sa telepono at solicitation letter na gumagamit sa pangalan ng parokya.
Pinayuhan ang mga makatatanggap ng ganitong kahilingan na huwag agad magbigay ng pera o personal na impormasyon.
Sa halip, dapat munang tiyakin ang pagiging lehitimo ng solicitation sa pamamagitan ng direktang pakikipag-ugnayan sa Our Lady of Lourdes Parish Office o sa opisyal na social media page ng parokya.
Ayon sa simbahan, ang anumang lehitimong fundraising activity o donation campaign na isasagawa sa pangalan nito ay pormal na ipaaalam sa pamamagitan ng mga awtorisadong communication channel.
Hinimok din ng parokya ang publiko na ipasa ang naturang babala sa iba pang parishioner at miyembro ng komunidad upang maiwasan ang posibleng mabiktima ng umano’y scam.
Binigyang-diin ng simbahan na dapat munang beripikahin ang anumang solicitation bago magbigay ng pera o sensitibong impormasyon, lalo na kung ginagamit dito ang pangalan ng isang simbahan, pari o religious organization.
