Kinuwestiyon ng ilang netizen ang pagkakapili sa anak ng isang barangay captain bilang isa sa limang benepisyaryo ng presidential scholarship program sa Bago City, Negros Occidental.
Ang isyu ay umikot sa ₱20,000 educational assistance na ipinagkaloob sa bawat napiling graduating college student sa ilalim ng scholarship component ng “Bawat Barangay Makikinabang” program ng administrasyong Marcos.
Batay sa impormasyon ng Philippine Information Agency (PIA), ang programa ay nagbibigay ng ₱100,000 para sa scholarship sa bawat barangay, na hinahati sa limang estudyante na tatanggap ng tig-₱20,000.
Sa kaso ng Barangay Tabunan, kabilang sa napiling benepisyaryo ang anak ni Barangay Captain Maria May C. Suarez.
Dahil dito, ilang residente at netizen ang nagpahayag ng pagdududa sa proseso ng pagpili, partikular sa posibleng conflict of interest dahil ang isa sa mga benepisyaryo ay anak ng kasalukuyang barangay official.
8 timbog sa 'di dokumentadong fishing vessel, 'di awtorisadong paglipat ng produktong petrolyo
Ipinaliwanag naman ni Suarez na limitado ang panahong ibinigay sa kanilang barangay para magsumite ng mga pangalan ng mga maaaring tumanggap ng scholarship.
Ayon sa barangay captain, dalawang araw lamang umano ang inilaan noong Pebrero para makapagsumite sila ng listahan. Naipasa na umano ang mga pangalan sa Malacañang bago inilabas noong Hulyo ang opisyal na guidelines para sa programa.
Sinabi rin ni Suarez na nahirapan silang makahanap ng iba pang kwalipikadong estudyante na maaaring punan ang kanilang slot dahil sa maikling panahon ng pagsusumite.
Sa pambansang programa, hinikayat mismo ni Pangulong Ferdinand “Bongbong” Marcos Jr. ang mga barangay official na pumili ng mga estudyanteng malapit nang makapagtapos ngunit nanganganib na hindi makumpleto ang pag-aaral dahil sa kakulangan sa pera.
Ang scholarship ay bahagi ng “Bawat Bayan Makikinabang” initiative ng pamahalaan na gumagamit ng Local Government Support Fund (LGSF) at iba pang government assistance upang pondohan ang mga proyekto at ayuda sa mga lokal na pamahalaan.
Samantala, humingi ng paumanhin si Suarez sa mga residenteng nagtanong tungkol sa pagpili sa kaniyang anak.
Iginiit niya na kumilos lamang ang barangay batay sa mga impormasyong at panahong ibinigay sa kanila kaugnay ng pagpapatupad ng programa.
Patuloy namang pinag-uusapan online ang transparency at proseso ng pagpili ng mga benepisyaryo, partikular kung paano dapat tugunan ang mga sitwasyong maaaring magdulot ng conflict of interest sa pagpapatupad ng scholarship program.
