Patuloy na tumataas ang antas ng tubig sa Laguna de Bay at umabot na sa 12.23 metro nitong hapon ng Biyernes, Agosto 14, 2026, ayon sa Laguna Lake Development Authority (LLDA).
Sa advisory ng LLDA, naitala ang 12.23 metrong water level sa lawa 1:00 ng hapon batay sa near-real-time monitoring ng ahensya gamit ang Radar Level Sensors. Mas mataas ito kumpara sa 12.17 metro na naitala kaninang 7:00 ng umaga.
Sa loob lamang ng siyam na araw, nakapagtala ang Laguna de Bay ng pagtaas na 0.93 metro o 930 millimeters. Mula sa 11.30 metro noong Agosto 6, umakyat ang lebel ng tubig sa 12.23 metro pagsapit ng Agosto 14.
Itinakda ng LLDA sa 10.50 metro ang critical low-water level ng lawa, habang 12.50 metro naman ang critical high-water level.
Dahil dito, nasa 27 sentimetro na lamang ang pagitan ng kasalukuyang lebel ng tubig at ng critical high-water mark.
Lalaking 102-anyos, patay matapos umanong itulak pababa ng 'stage!'
Ayon sa LLDA, nananatili pa sa normal-to-safe transition range ang antas ng Laguna de Bay, ngunit patuloy itong minomonitor dahil sa walang tigil na pag-ulan na dulot ng enhanced southwest monsoon o habagat.
Nagsisilbi ring natural catch basin ang Laguna de Bay para sa mga watershed sa Rizal, Laguna at ilang bahagi ng Metro Manila. Dahil dito, maaaring patuloy na tumaas ang tubig sa lawa kapag nagpapatuloy ang katamtaman hanggang malakas na pag-ulan sa mga susunod na araw.
Samantala, iniulat ng Philippine Atmospheric, Geophysical and Astronomical Services Administration (PAGASA) na patuloy na nagdadala ng malalakas na pag-ulan ang habagat sa ilang bahagi ng Luzon at Visayas nitong Biyernes.
Nagdulot na rin ang mga pag-ulan ng pagbaha sa ilang lugar at nag-udyok sa ilang lokal na pamahalaan na magsuspinde ng klase.
Posible ring lumakas pa ang habagat sa mga susunod na araw dahil sa inaasahang pagbuo ng isang low-pressure area (LPA) sa loob ng Philippine Area of Responsibility (PAR) mula Linggo hanggang unang bahagi ng susunod na linggo.
Dahil dito, hinikayat ng LLDA ang mga komunidad na nakatira sa mabababang bahagi ng lakeshore at mga lokal na pamahalaan na maging handa sa posibleng pagbaha.
Pinayuhan din ang mga kinauukulan na linisin at tiyaking walang bara ang mga drainage system at mga tributary river na dumadaloy patungong Laguna de Bay upang makatulong sa pagpapababa ng panganib ng pagbaha.
