Dalawang beses naantala ang laro ng San Miguel Beermen at Macau Black Bears sa PBA Season 50 Governors’ Cup noong gabi ng Sabado, Agosto 8, sa Ynares Center sa Montalban, Rizal dahil sa tumutulong bubong.
Nakatakdang magsimula ang laban sa ganap na 7:30 ng gabi, ngunit naantala ito nang humigit-kumulang 25 minuto dahil sa ilang basang bahagi sa mismong basketball court.
Matapos suriin ng mga opisyal ng liga ang kondisyon ng sahig at masiguro na maaari pang paglaruan ang court, itinuloy ang laban.
Gayunman, muli itong nahinto nang may 1:06 na nalalabi sa unang quarter dahil sa patuloy na malakas na pag-ulan na nagdulot ng panibagong pagtagas ng bubong sa loob ng venue.
Naghintay ang dalawang koponan ng karagdagang 15 minuto bago muling maipagpatuloy ang laro.
Mga manlalaro ng Ateneo Men’s basketball team, biktima rin sa nangyari sa Aurora—UAAP
Sa kabila ng mga pagkaantala, nanaig ang San Miguel kontra sa import-less Macau, 131-79.
Hindi ito ang unang pagkakataon sa loob lamang ng dalawang araw na naapektuhan ng pagtagas ng bubong ang laro ng PBA.
Noong Biyernes, Agosto 7, napahinto rin ang laban ng Magnolia at Meralco sa Ninoy Aquino Stadium dahil sa malakas na pagtagas ng bubong habang nagpapatuloy ang laro.
Ang magkakasunod na insidente ay naganap habang patuloy ang malalakas na pag-ulan sa Metro Manila at mga karatig-lugar dahil sa southwest monsoon o habagat, na pinalalakas ng Tropical Depression “Maymay.”
Dahil sa patuloy na masamang panahon, tuluyan namang ipinagpaliban ng PBA ang dalawang laro na nakatakda ngayong Linggo, Agosto 9, sa Ninoy Aquino Stadium.
Dapat sanang magharap ang Phoenix Super LPG at Rain or Shine, habang nakatakda namang maglaban ang Barangay Ginebra at Blackwater.
Ayon sa PBA, pangunahing konsiderasyon nito ang kaligtasan ng mga manlalaro, opisyal, staff at mga manonood.
“In light of the severe weather conditions, and with the safety of our fans, players, officials and staff as our top priority, the PBA has decided to postpone its Sunday, August 9 games,” anang PBA sa kanilang opisyal na Facebook page.
Sinabi ng liga na iaanunsyo pa ang bagong schedule ng dalawang ipinagpalibang laro at hinimok ang publiko na magsagawa ng kinakailangang pag-iingat at unahin ang kaligtasan.
