Sugatan ang isang criminology intern matapos siyang barilin sa braso nang makialam sa mainitang pagtatalo ng mag-asawa sa Perez Street, Poblacion, Kidapawan City, noong Sabado ng umaga, Agosto 8, 2026.
Ayon sa paunang imbestigasyon ng pulisya, nasa malapit na isang carinderia ang biktima nang mapansin nito ang mag-asawang nagtatalo sa kabilang bahagi ng kalsada.
Umano’y sinigawan ng biktima ang mag-asawa, dahilan upang lapitan siya ng lalaki at komprontahin kung bakit ito nakikialam sa kanilang alitan.
Matapos ang komprontasyon, umalis umano ang suspek at umuwi sa kanilang bahay.
Gayunman, bumalik umano siya sa lugar matapos kumuha ng baril at pinaputukan ang biktima.
Tuloy ang libing! Kabaong, isinakay sa 'styrofoam boat' para maitawid sa baha
Tinamaan sa braso ang criminology intern bago umano tumakas ang suspek sakay ng isang motorsiklo.
Agad namang nagsagawa ng manhunt operation ang mga tauhan ng Kidapawan City Police matapos ireport ang pamamaril.
Kalaunan, naaresto ng mga awtoridad ang itinuturong gunman at ang driver ng motorsiklong sinasabing ginamit sa pagtakas.
Isinugod naman sa pinakamalapit na ospital ang biktima para malapatan ng lunas.
Patuloy ang imbestigasyon ng pulisya upang matukoy ang buong pangyayari, kabilang ang eksaktong papel ng dalawang naaresto sa insidente.
Inaalam din ng mga awtoridad ang iba pang ebidensiya na maaaring magpatibay sa mga kasong posibleng isampa laban sa mga suspek.
Ang anumang magiging kaso ay nakadepende sa mga makakalap na ebidensiya at sa magiging pagsusuri ng mga prosecutor.
