Isang truck driver ang isinugod sa ospital matapos maipit sa pagitan ng dalawang container van sa loob ng isang warehouse sa Barangay Puntod, Cagayan de Oro City noong umaga ng Miyerkules, Hulyo 22, 2026.
Batay sa paunang imbestigasyon, nasa gilid umano ng isang container van ang driver nang ilipat ng isang forklift operator ang isa pang container sa katabing puwesto.
Hindi umano namalayan ng operator na naroon ang biktima hanggang sa makarinig ng malakas na sigaw ang mga manggagawa sa lugar. Ayon sa ilang saksi, posible umanong umiihi sa gilid ang biktima nang nangyari ang aksidente.
Agad na rumesponde ang mga empleyado at pinaatras ang container na inililipat upang mailabas ang naipit na driver. Matapos ang rescue operation, dinala siya sa ospital para sa agarang gamutan.
Ayon sa mga doktor, nagtamo ang biktima ng mga bali sa braso at kaniyang tadyang, ngunit nasa ligtas na kondisyon na habang patuloy na nagpapagaling.
Grade 3 pupil, patay sa sapak ng mga kaklase sa Davao City!
Patuloy namang inaalam ng mga awtoridad ang eksaktong pangyayari at kung nasunod ang mga ipinatutupad na safety protocol sa lugar nang mangyari ang insidente.
Samantala, napagkasunduan umano ng truck driver at ng forklift operator na hindi na magsampa ng kaso kaugnay sa nangyari matapos silang magkaayos.
Wala namang iniulat na iba pang nasugatan sa insidente.
