Natukoy na ng mga awtoridad ang mga menor de edad na sangkot sa pagpapakalat ng banta sa seguridad laban sa dalawang paaralan sa Talisay City, Cebu.
Ayon sa imbestigasyon ng pulisya, dalawang estudyante na may edad na 12 at 13 taong gulang ang responsable sa pag-post ng mga pagbabanta sa social media na may kaugnayan sa umano'y pamamaril sa mga paaralan.
Ang unang insidente ay iniulat sa Talisay City National High School noong Hulyo 5, habang isa pang paaralan sa lungsod ang nakatanggap ng kahalintulad na banta kinabukasan.
Lumabas sa imbestigasyon na inamin ng mga menor de edad ang kanilang pagkakasangkot sa pagpapakalat ng mga naturang mensahe online. Napag-alaman din na ginawa umano nila ito upang magkaroon ng suspensyon ng klase dahil hindi sila nakapaghanda para sa nakatakdang pagsusulit sa susunod na araw.
Kasunod ng insidente, ipinatawag ng pamahalaang panlalawigan ng Cebu ang dalawang mag-aaral, kasama ang isa pang menor de edad mula sa Carcar City na nahulihan ng patalim sa labas ng isang paaralan, upang makapanayam ng mga opisyal ng lalawigan noong Hulyo 13. Dumalo rin sa pagpupulong ang mga magulang ng mga bata.
Lalaking umiihi sa gilid, naipit sa pagitan ng 2 container van!
Samantala, nagsimula na ang Department of Social Welfare and Development (DSWD) ng kaukulang intervention program para sa tatlong menor de edad upang mabigyan sila ng gabay at suporta.
Bilang tugon sa insidente, naghigpit ng seguridad ang Talisay City National High School sa pagpasok at paglabas ng mga estudyante sa campus. Kabilang sa mga bagong patakaran ang paggamit lamang ng transparent na ballpen upang maiwasan ang pagtatago ng matutulis na bagay.
Inatasan din ang mga guro na pansamantalang kumpiskahin ang mga gamit ng estudyanteng may matutulis na bahagi gaya ng gunting, cutter at compass, at ibalik lamang ang mga ito kung kinakailangan sa mga aktibidad sa loob ng silid-aralan.
Magpapatuloy rin ang regular na pagbisita ng mga pulis sa mga paaralan sa lungsod bilang bahagi ng pagpapatibay ng seguridad at pagtiyak sa kaligtasan ng mga mag-aaral at guro.
Hinimok naman ng mga awtoridad ang mga magulang na bantayang mabuti ang aktibidad ng kanilang mga anak, kabilang ang kanilang paggamit ng social media at mga taong kanilang nakakasalamuha, upang maiwasan ang mga kahalintulad na insidente sa hinaharap.
