Inaresto ng pulisya ang dating nurse noong Miyerkules, Hulyo 15, 2026 matapos siyang masangkot sa umano'y pagkamatay ng isang 75-anyos na pasyente sa isang ospital noong Enero 2026.
Kinilala ng mga awtoridad ang suspek bilang isang 51-anyos na babae na dating nagtatrabaho sa Kashiwa Tanaka Hospital sa lungsod ng Kashiwa, Japan. Gayunman, itinanggi umano niya ang mga paratang na iniuugnay sa kaniya.
Batay sa imbestigasyon, pinaniniwalaang nagkaroon ng kontaminasyon sa intravenous (IV) drip na ginagamit ng pasyente habang naka-duty ang suspek sa night shift ng ospital.
Ilang oras matapos mapansin ng mga healthcare worker ang biglaang paglala ng kondisyon ng pasyente, isinailalim ito sa agarang gamutan ngunit kalaunan ay nasawi rin dahil sa komplikasyong dulot ng matinding impeksiyon sa dugo at multiple organ failure.
Sa pagsusuri ng mga imbestigador, nakakita umano ng hindi pangkaraniwang substansiya sa IV line ng pasyente. Lumabas din sa isinagawang laboratory examination na may pagkakatulad ang natagpuang bakterya sa IV apparatus at sa dugo ng biktima.
HIV cases sa bansa, pumalo na ng mahigit 4,000 sa 1st quarter ng 2026!
Nagsimula ang pormal na imbestigasyon matapos iulat ng pamunuan ng ospital sa pulisya ang posibilidad na may naihalong banyagang materyal sa isinagawang intravenous treatment ng pasyente bago ang kanyang pagpanaw.
Lumabas sa imbestigasyon na dalawang nurse lamang ang nakaatas sa ward kung saan naka-confine ang biktima nang mangyari ang insidente. Isa sa mga naging batayan ng mga awtoridad sa pagtukoy sa suspek ay ang mga kuha mula sa closed-circuit television (CCTV) cameras sa loob ng ospital.
Nagbitiw sa kaniyang trabaho ang suspek ilang linggo matapos ang insidente, ayon sa mga ulat.
Patuloy namang inaalam ng mga awtoridad ang posibleng motibo sa likod ng insidente at kung paano nakuha ng suspek ang materyal na sinasabing ginamit sa krimen.
Samantala, nagpahayag ng pakikipagtulungan sa imbestigasyon ang medical corporation na nangangasiwa sa Kashiwa Tanaka Hospital at tiniyak ang pagpapatupad ng mga hakbang upang maiwasan ang kahalintulad na insidente sa hinaharap.
