Marami ang naaaliw sa pag-aalaga ng kuting, ngunit kalakip nito ang malaking responsibilidad na matiyak na magiging malusog, ligtas, at masaya ang alagang pusa.
Narito ang ilang mahahalagang do's at don'ts na inirerekomenda ng mga beterinaryo at animal welfare experts sa pag-aalaga ng kuting, para sa pagdiriwang ng National Kitten Day.
MGA DAPAT GAWIN (DO'S)
1. Dalhin agad sa beterinaryo
Kapag may bagong kuting sa bahay, mahalagang ipasuri agad ito sa beterinaryo upang masuri ang kalusugan nito, mabigyan ng tamang bakuna, at matingnan kung may parasites o iba pang karamdaman.
Asong nasagip bago isailalim sa euthanasia, lilipad na sa US!
2. Bigyan ng tamang pagkain para sa kuting
Mas mataas ang pangangailangan ng mga kuting sa protina at enerhiya kumpara sa adult cats dahil mabilis pa ang kanilang paglaki. Mainam na gumamit ng pagkain na partikular para sa kuting. Maaaring sumangguni sa beterinaryo tungkol dito.
3. Siguraduhing may malinis na tubig
Dapat laging may malinis at sariwang tubig na maiinom ang kuting upang maiwasan ang dehydration at mapanatili ang mabuting kalusugan nito.
4. Panatilihing ligtas at komportable ang kapaligiran
Maglaan ng maayos na tulugan, litter box, laruan, at scratching area. Makatutulong din ang indoor environment upang maiwasan ang aksidente, sakit, at pagkalantad sa panganib sa labas.
5. Bigyan ng oras para makipaglaro at makisalamuha
Mahalaga ang socialization at paglalaro sa paghubog ng ugali at kumpiyansa ng kuting habang ito ay lumalaki.
MGA HINDI DAPAT GAWIN (DON'TS)
1. Huwag painumin ng gatas ng baka
Taliwas sa popular na paniniwala, maraming kuting ang hindi nakatutunaw nang maayos ng gatas ng baka at maaari itong magdulot ng pagtatae at iba pang problema sa tiyan. Para sa mga napakabatang kuting, espesyal na kitten milk replacer ang dapat gamitin.
2. Huwag pakainin ng ilang pagkain ng tao
Iwasang bigyan ng tsokolate, sibuyas, bawang, at iba pang pagkain ng tao na maaaring makalason sa mga pusa.
3. Huwag magbigay ng gamot para sa tao
Ang ilang karaniwang gamot para sa tao gaya ng paracetamol o acetaminophen ay maaaring maging nakamamatay sa mga pusa. Kumonsulta muna sa beterinaryo bago magbigay ng anumang gamot.
4. Huwag hayaang gumala agad
Mas mataas ang panganib ng aksidente, sakit, at pag-atake ng ibang hayop sa mga kuting na pinababayaang gumala sa labas.
5. Huwag balewalain ang mga senyales ng sakit
Kapag napansing matamlay, ayaw kumain, nagtatae, nagsusuka, o hirap huminga ang kuting, agad itong ipasuri sa beterinaryo. Ang maagang pagpapatingin ay makatutulong upang maiwasan ang mas malalang komplikasyon.
Paalala:
Ayon sa Cornell Feline Health Center at iba pang veterinary organizations, ang wastong nutrisyon, regular na pagpapatingin sa beterinaryo, at ligtas na kapaligiran ang ilan sa pinakamahahalagang pundasyon upang lumaking malusog at masigla ang isang kuting.
