Bahagyang umangat ang ranggo ng Philippine passport sa pinakabagong Henley Passport Index matapos itong pumuwesto sa ika-72 puwesto sa buong mundo, na nagbibigay sa mga Pilipino ng visa-free o visa-on-arrival access sa 65 destination.
Kapantay ng Pilipinas sa naturang ranggo ang Mongolia at Sierra Leone, na nagpapakita ng bahagyang pagbuti sa global mobility ng mga Pilipinong biyahero kumpara sa mga nagdaang taon.
Kabilang sa mga bansang madaling mapupuntahan ng mga may hawak ng Philippine passport ang Singapore, Thailand, Malaysia, Indonesia, Vietnam, Cambodia, Laos, Brunei, at Myanmar sa Southeast Asia, alinsunod sa kani-kanilang umiiral na polisiya sa pagpasok ng mga dayuhang bisita.
Maaari ring bumiyahe ang mga Pilipino sa Hong Kong, Taiwan, at Macao sa East Asia, gayundin sa ilang bansa sa Latin America tulad ng Brazil, Peru, Colombia, Bolivia, at Ecuador sa pamamagitan ng visa-free o visa-on-arrival arrangements.
Kasama rin sa mga destinasyong may mas pinadaling pagpasok para sa mga Pilipino ang Israel, Fiji, Morocco, at Vanuatu.
Sen. Lacson kay Atty. Kapunan: 'I never talked about birds!'
Sa kabila ng pag-angat ng Pilipinas, nananatiling mas mataas ang ranggo ng ilang kapratig-bansa nito sa Southeast Asia.
Patuloy na hawak ng Singapore ang isa sa pinakamakapangyarihang pasaporte sa mundo, na nagbibigay ng visa-free access sa mahigit 190 destinasyon.
Samantala, nanatili namang wala sa top 10 ang pasaporte ng United States batay sa taunang Global Passport Report ng Global Citizen Solutions, kung saan nasa ika-12 puwesto ito.
Hindi lamang visa-free travel ang batayan ng naturang ulat, kundi isinasaalang-alang din ang international mobility, investment attractiveness, at kalidad ng pamumuhay upang masukat ang kabuuang lakas ng isang pasaporte.
Ayon sa pinakahuling pagsusuri, nananatiling kabilang ang US passport sa pinakamalalakas sa mundo, ngunit hindi sapat ang marka nito upang makabalik sa top 10 ng pinakabagong edisyon ng ulat.
