Patuloy na tinutugis ng mga awtoridad ang hindi pa nakikilalang suspek na bumaril at pumatay sa isang pulis habang nagdarasal sa loob ng isang mosque sa bayan ng Madamba, Lanao del Sur noong gabi ng Sabado, Hunyo 20, 2026.
Kinilala ng Police Regional Office–Bangsamoro Autonomous Region (PRO-BAR) ang biktima na si Police Chief Master Sergeant Alioden Sarangani, na nakatalaga sa Madamba Municipal Police Station at residente ng bayan ng Madalum.
Batay sa paunang imbestigasyon, naganap ang insidente dakong 7:42 ng gabi sa isang mosque sa Barangay Upper Uyaan Proper. Habang abala sa pagdarasal ang pulis, nilapitan umano siya ng salarin mula sa likuran at binaril sa ulo.
Dahil sa tinamong tama ng bala, agad na nasawi si Sarangani sa lugar ng insidente.
Kaagad namang kinuha ng kaniyang mga kaanak ang labi ng pulis upang maisagawa ang paglilibing alinsunod sa mga tradisyon at kaugalian ng pananampalatayang Islam.
Lalaking ‘di pinautang ng ₱100, nanutok ng baril!
Mariing kinondena ng pamunuan ng PRO-BAR ang pagpatay sa isang hindi armado at wala sa oras ng tungkulin na miyembro ng Philippine National Police, lalo na't naganap ito sa loob mismo ng isang lugar sambahan.
Sa kasalukuyan, nagsasagawa ng mas pinaigting na hot pursuit operation at intelligence gathering ang Lanao del Sur Provincial Police Office upang matukoy at madakip ang responsable sa krimen.
Sinusuri rin ng mga imbestigador ang mga posibleng motibo at ang mga lead na maaaring makatulong sa agarang paglutas ng kaso.
Nanawagan naman ang pulisya sa publiko na makipagtulungan at magbigay ng anumang impormasyong maaaring makatulong sa pagkakakilanlan at pag-aresto sa suspek.
Patuloy ang imbestigasyon habang hinihintay rin ng mga awtoridad ang resulta ng iba pang forensic at intelligence examinations kaugnay ng insidente.
