Trahedya ang sinapit ng isang 34-anyos na mekaniko matapos siyang masawi habang kinukumpuni ang isang sasakyan sa Cagayan de Oro City noong Biyernes, Hunyo 19, 2026.
Ayon sa paunang imbestigasyon ng pulisya, nagtatrabaho ang biktima sa ilalim ng isang sports car malapit sa isang terminal ng bus nang biglang bumigay ang ginagamit niyang scissor jack. Dahil dito, bumagsak ang sasakyan at naipit ang mekaniko sa ilalim nito.
Nagtamo ang biktima ng matinding pinsala sa ulo at iba pang bahagi ng katawan na naging sanhi ng kaniyang agarang pagkamatay.
Batay sa salaysay ng mga saksi, nakita pa nilang abala ang mekaniko sa pagkukumpuni ng sasakyan bandang 6:00 ng umaga.
Makalipas lamang ang ilang oras, nadiskubre na siyang wala nang buhay matapos ang aksidente.
Bombang 'di sumabog, narekober sa Davao City
Sinabi ng mga awtoridad na walang indikasyon ng foul play sa insidente. Lumalabas sa kanilang pagsusuri na maaaring hindi kinaya ng jack ang bigat ng sasakyan, dahilan upang ito ay bumigay habang nasa ilalim ang biktima.
Ayon sa pulisya, isa ring posibleng dahilan ang mababang disenyo ng sports car na nagpapahirap sa ligtas na pag-angat nito gamit lamang ang karaniwang kagamitan.
Labis naman ang pagdadalamhati ng pamilya ng nasawi. Ayon sa kapatid ng biktima, matagal nang mekaniko ang kanilang kaanak at may sapat na karanasan sa pagkukumpuni ng mga sasakyan kaya hindi nila inasahang mauuwi sa trahedya ang kaniyang trabaho.
Pinag-aaralan ngayon ng mga awtoridad kung pansamantalang ilalagay sa kanilang kustodiya ang sasakyan habang isinasagawa ang mas malalim na imbestigasyon.
Nakatakda rin ang pag-uusap ng pamilya ng biktima at ng may-ari ng sasakyan kaugnay sa nangyaring insidente.
Patuloy ang paalala ng mga awtoridad sa mga mekaniko at iba pang nagtatrabaho sa ilalim ng mga sasakyan na gumamit ng karagdagang safety equipment at matitibay na suporta upang maiwasan ang kahalintulad na aksidente.
