Pinagbabawalan na ng University Athletic Association of the Philippines (UAAP) ang sinumang coaching staff ng Ateneo de Manila University (ADMU) na nasa Dipaculao, Aurora noong nakaraang Lunes, Hunyo 8, na sumali sa lahat ng UAAP-related activities. 

Sa pahayag ng UAAP nitong Biyernes, Hunyo 19, ang pagbabawal sa partisipasyon ng mga ADMU staff na nasa Aurora noong Hunyo 8 ay epektibo habang gumugulong ang imbestigasyon sa likod ng trahedyang pagkasawi nina Rene Baterbonia at Divine Adili ng Ateneo Blue Eagles Men’s Basketball Team. 

Anila, ito ay nagsisilbing preemptive measure na ibinaba bago pa man magsimula ang UAAP season upang mapreserba at matiyak ang integridad, katapatan,  at tamang proseso ng imbestigasyon. 

“This preemptive measure, adopted even prior to the UAAP season, is intended to preserve the integrity of the ongoing inquiry and to ensure full transparency and due process as facts surrounding the incident are being carefully examined,” saad ng UAAP.

Binigyan din ng UAAP ng palugit ang ADMU hanggang Hulyo 15, upang maisumite nila ang mga opisyal na resulta ng kanilang imbestigasyon sa trahedya. 

Mantra ni Alex Eala: ‘Wag magduda!

“In addition, the UAAP has set July 15, 2026 as the deadline for the submission of the official findings of Ateneo de Manila University regarding the incident,” dagdag ng UAAP. 

Nilinaw ng UAAP na dahil binibigyan nila ng importansya ang pananagutan tiniyak nila na sinumang mapapatunayang responsable sa trahedya ay dapat managot sa ilalim ng kanilang regulasyon. 

“The UAAP reiterates that accountability shall be determined based on the results of a thorough and impartial investigation and its fidelity to its own rules and regulations. All those found responsible for any wrongdoing shall be held fully accountable under league regulations,” pagtitiyak ng UAAP. 

Samantala, nagpahatid din ng pakikisimpatya ang UAAP sa mga naulilang pamilya nina Baterbonia at Adili, at tiniyak na pananatilihing buhay ang mga alaala ng mga ito habang sinisiguradong magbibigay proteksyon sa iba pang student-athletes upang maiwasang maulit ang kaparehang insidente. 

“Above all, the UAAP extends its deepest sympathies to the bereaved parties and calls for justice, truth, and dignity for those who lost their lives in the incident. Their memories will be honored with the commitment to further protect our student-athletes so that such tragedy will never happen again,” pakikiramay ng UAAP.