Bago pa man mauso ang Netflix, YouTube, streaming apps, at mga smart TV, may dalawang teknolohiyang minsang namayagpag sa bawat tahanan ang masarap balik-balikan: ang Betamax at VHS tapes.
Ngayong ginugunita ang National Video Cassette Recorder (VCR) Day sa ibang bansa, binabalikan din ng maraming Pilipino ang panahong kailangang mag-rewind muna ng tape bago manood ng pelikula o kaya'y maghintay ng tamang oras upang ma-record ang paboritong programa sa telebisyon.
Noong dekada '80 at '90, isa sa mga pinakasikat na kagamitan sa bahay ang VCR. Sa pamamagitan nito, maaaring magpatugtog at mag-record ng mga palabas gamit ang magnetic tapes.
Dalawa sa mga pangunahing format na nag-agawan noon sa merkado ang Betamax at VHS.
Ang Betamax ay binuo ng Sony noong 1975 at kilala sa mas malinaw na kalidad ng larawan. Gayunman, mas naging popular ang VHS o Video Home System na inilunsad naman ng JVC dahil mas mahaba ang recording time nito at mas marami ang kumpanyang gumamit ng teknolohiya.
Mga suportang maibibigay ng mga kaanak sa isang cancer survivor
Dahil dito, unti-unting nanaig ang VHS sa tinaguriang "format war" at naging pangunahing video format sa buong mundo sa loob ng maraming dekada.
Sa Pilipinas, naging bahagi ng kultura ng maraming pamilya ang pagrenta ng VHS tapes sa mga video rental shop. Tuwing weekend, karaniwan nang pumipila ang mga tao upang manghiram ng mga pelikulang aksyon, komedya, horror, o drama na maaari nilang panoorin kasama ang buong pamilya.
Naging uso rin noon ang pagre-record ng mga paboritong programa sa telebisyon, concerts, at maging mga mahahalagang okasyon gaya ng kasal, binyag, at kaarawan. Hindi pa kasi uso noon ang streaming apps na puwedeng balik-balikan o i-download ang mga video.
Para sa marami, hindi lamang simpleng teknolohiya ang VCR. Isa rin itong simbolo ng isang panahon kung kailan sabay-sabay nanonood ang buong pamilya sa sala at naghihintay sa susunod na eksena habang umiikot ang tape sa loob ng makina.
Bagama't tuluyan nang napalitan ng DVDs, Blu-ray, at kalaunan ay ng digital streaming platforms ang VCR, nananatili itong mahalagang bahagi ng kasaysayan ng home entertainment.
Para sa mga lumaki noong dekada '80 at '90, ang tunog ng umiikot na VHS tape ay hindi lamang ingay ng isang makina—isa itong tunog ng nostalgia at masasayang alaala ng nakaraan.
