Binigyan ng full scholarship ng Dr. Yanga’s Colleges, Inc. (DYCI) ang dalawa sa kanilang freshman nursing students matapos nilang tulungan ang isang jeepney driver na nakaranas ng heat stroke sa kalsada, kamakailan.
Sa Facebook post ng DYCI noong Huwebes, Mayo 28, habang nakasakay sa jeep papunta sa kaniyang klase, napansin ni Precious Jewel Pescador na nahihirapan huminga ang driver.
Dahil sa hinalang nakararanas ito ng heat stroke, agad niyang nilapitan ang driver at tiningnan ang vital signs nito, katuwang ang kapwa freshman na si Joana Mae Barquilla.
Bagama’t inabot ng 20 minuto bago makarating ang ambulansya sa kinaroroonan ng kanilang jeep, sinamahan nila Precious at Joana ang driver hanggang sa makarating sila sa pinakamalapit na ospital.
Dahil dito, naging stable ang kondisyon ng driver at natiyak ang kaligtasan nito.
DOST, nagpaalala sa panganib na dulot ng itlog ni 'Vanessa'
Bukod sa full scholarship, kinilala pa ng DYCI sina Precious at Joana bilang inspirasyon dahil sa kanilang malasakit sa kapwa.
“Acts like these remind us that being a DYCIan is not only about excellence in academics, but also about having a heart that responds when others need help the most. Your kindness and compassion made a difference. We are truly proud of you, Precious Jewel Pescador and Joana Mae Barquilla, freshman Nursing students from DYCI–College of Health Sciences,” pagkilala ng pamantasan.
“Thank you for the inspiration. God bless your selfless and caring hearts, Precious and Joana,” dagdag pa nito.
