Ilang mambabatas at iba pang personalidad ang pinangalanan ng grupong tinaguriang “18 ex-Marines” sa isinagawang pagdinig ng Blue Ribbon Committee na pinamumunuan ng kampo ni Senate President Alan Peter Cayetano kaugnay ng mga alegasyon ng iregularidad sa flood control projects, nitong Huwebes, Hunyo 4.
Sa kanilang testimonya, sinabi ng mga dating miyembro ng Philippine Marines na umano’y naghatid sila ng pera sa ilang personalidad na kanilang iniuugnay sa mga sinasabing anomalya sa implementasyon ng mga proyekto laban sa pagbaha.
Kabilang sa mga pinangalanan sa pagdinig sina Mamamayang Liberal (ML) party-list Rep. Leila de Lima, Bicol Saro party-list Rep. Terry Ridon, Batangas 2nd District Rep. Gerville Luistro, Manila 6th District Rep. Benny Abante, Lanao Del Sur 1st District Rep. Zia Adiong, Palawan 2nd District Rep. Jose Alvarez, Manila 3rd District Rep. Joel Chua, at Iloilo 1st District Rep. at House Deputy Speaker Janette Garin.
Nabanggit din sa testimonya ang mga dating mambabatas na sina ACT Teachers party-list Rep. France Castro, Gabriela party-list Rep. Arlene Brosas, Surigao Del Norte 2nd District Rep. Ace Barbers, Lone District of Sta. Rosa, Laguna Rep. Dan Fernandez, Kabataan party-list Rep. Raoul Manuel, at Marikina 2nd District Rep. Stella Quimbo, gayundin si Fr. Flavie Villanueva.
Gayunman, sa kasalukuyan ay wala pang inilalabas na ebidensiyang publiko na nagpapatunay sa mga alegasyong ito, at hindi pa rin malinaw kung may isasampang kaukulang kaso laban sa mga nabanggit na personalidad.
'Parang Petra 'yan, e!' Matibag, pumalag sa hamon ni SP Alan Peter
Binigyang-diin ng mga senador na nagsasagawa ng imbestigasyon na bahagi lamang ng pagdinig ang pagkalap ng testimonya at iba pang ebidensiya upang matukoy kung may sapat na basehan ang mga paratang na inilahad.
Samantala, inaasahang hihingan ng panig ng Senado ng pahayag ang mga personalidad na pinangalanan upang mabigyan sila ng pagkakataong sagutin ang mga alegasyon laban sa kanila.
Patuloy pa rin ang imbestigasyon ng Blue Ribbon Committee hinggil sa umano’y mga anomalya sa flood control projects, kabilang ang pinagmulan at destinasyon ng pondong sinasabing may kaugnayan sa mga iregularidad.
Sa ngayon, nananatiling mga alegasyon pa lamang ang mga pahayag na inilahad sa pagdinig at wala pang pinal na pasya o hatol mula sa anumang hukuman kaugnay ng usapin.
