Inihayag ni Department of Social Welfare and Development (DSWD) Secretary Rex Gatchalian na obligado o mandatoryong makibahagi sa Brigada Eskuwela ang mga benepisyaryo ng Pantawid Pamilyang Pilipino Program (4Ps).
Sa pagbisita ni Sec. Rex Gatchalian sa Brigada Eskuwelang ikinasa sa Bagong Silang Elementary School (Gen. Licerio Annex) noong Lunes, Hunyo 1, inilahad niyang paraan umano ito ng mga benepisyaryo na ibalik sa komunidad ang tinatamasa nilang tulong.
“Bayanihan in the sense na sila, tinutulungan sila ng bayan sa pamamagitan ng cash grant. In return, ibinabalik nila para makatulong naman sa mga bata, para sa mga paaralan,” saad ni Sec. Rex Gatchalian.
Aniya, “This is their way of giving back. Itinuturo namin ‘yan during the Family Development Sessions (FDS).”
“Nationwide, ‘yong mga pamilya ng 4Ps ay required to help in community building at kasama diyan ‘yong tumutulong sila sa pagkukumpuni at paglilinis during the Brigada Eskuwela para sa paghahanda sa pasukan,” diin pa niya.
Sen. Ping, binuweltang 'di puwedeng panangga Senado sa batas!
Giit pa ng DSWD, ang inisyatibong ito ay nagmula mula sa direktiba ni Pangulong Ferdinand “Bongbong” Marcos, Jr.
Inaasahang pormal na magbubukas ang taong pampaaralan 2026-2027 sa darating na Lunes, Hunyo 8.
