Nataranta ang mga residente sa C. Mariano Street sa Taguig City matapos magsunod-sunod ang naging mala-fireworks na pagsabog ng mga kawad ng kuryente sa kanilang lugar.
Mapapanood sa ngayo’y pinag-uusap na Facebook reel ng netizen at residenteng si Dones Jade na malalakas ang naging pagsabog ng mga kableng nakasabit sa tapat ng bahay nila.
Sa eksklusibong panayam ng Balita kay Dones, ibinahagi niyang nakuhanan niya ang pagsabog na ito bandang 11:00 PM ng Miyerkules, Mayo 27.
Aniya pa, sa unang pagkislap pa lamang, kinuha na niya ang kaniyang phone upang makuhanan ng video ito, ngunit hindi niya inasahang tatagal ang pagliyab ng kawad, kasunod ng mga malalakas na pagsabog.
“Nangyari ito kagabi, May 27, sa ganap na 11ng gabi. Noonng una pa lang itong kumislap kinuha ko na ang cp ko para videohan kung ano mangyayari, hindi ko inasahan na halos tumagal ang pag liyab ng kawad kasunod ng huling malakas na pag sabog nito,” ani Dones.
ALAMIN: Kapag sinabing ‘force majeure,’ anong ibig sabihin?
Ibinahagi ni Dones na agad rumesponde ang mga taga-ayos ng kuryente at umabot ang pagre-repair ng mga kable hanggang 4:00 AM.
Ang itinuturong sanhi ng pagsabog ay overload sa isang kawad dahil hindi na raw kinakaya ng transformer.
Ipinaliwanag din ni Dones na sa gawi nila, dalawa ang kawad, at sa bagong nandito, apat lang na kabahayan ang legal na naka-tap dito, habang sa luma ay mayroong higit 30 kabahayan na legal na naka-tap.
Kaya inilipat ang higit 15 na kawad sa bago upang maiwasan na ang panganib ng muling pagsabog at posibleng pag-aagawan sa kuryente.
“Bale dalawa po yung kawad sa gawi namin. Yung bagong kawad eh apat lamang po na household ang naka-tap at sa lumang kawad namin ay halos 30+ household. Minarapat sana na maglagay ng isa pang transformer, pero nakita ng mga gumawa na oveload yung sa kawad namin, kaya ginawa ay inilipat ang halos 15+ household sa kabilang kawad upang hindi mag-agawan sa kuryente sa iisang kawad,” saad ni Dones.
Ibinahagi rin ni Dones na tatlong sunod-sunod na gabi nang nangyayari ang pagsiklab ng mga kawad at hindi lamang ito sa lugar ng Mariano Street nagaganap, ngunit maging sa iba pang panig ng Taguig.
Bale 3 besess ito nangyari, sunod-sunod na. Hindi lamang po sa lugar namin ang may ganitong pangyayari halos sa ilang panig ng Taguig, Ibayo, pinagsama, at sa iba'- ibang panig sa Bicutan. Pero yung kagabi halos iba't-ibang lugar sunod- sunod na pagkakaparehong sitwasyon,” saad ni Dones.
Sa kasalukuyan, maayos na raw ang mga linya ngunit patuloy pa rin daw nila itong binabantayan kung sakaling pumutok ito muli.
