Kinumpirma ni Department of Foreign Affairs (DFA) Spokesperson Analyn Ratonel na ilan lamang ang usapin ng security at economy sa mga mapag-uusapan sa ikakasang state visit ni Pangulong Ferdinand “Bongbong” Marcos, Jr., kasama si First Lady Liza Araneta-Marcos sa Japan, sa darating na Mayo 26 hanggang 29.
“Bibisita si Pangulong Ferdinand R. Marcos, Jr. at First Lady Louise Araneta-Marcos sa Japan from 26-29 May 2026, sa imbitasyon ng government of Japan,” saad ni Ratonel sa isinagawang press briefing ng Malacañang Press Corps (MPC) nitong Lunes, Mayo 25.
Giit niya, tsansa raw ito upang magkaroon ng dayalogo si PBBM at Japan Prime Minister Sanae Takaichi tungkol sa mga mahahalagang usapin tungkol sa defense at energy resilience.
“Napakahalaga po ng biyaheng ito sapagkat ito ang pagkakataon para makapag-usap si Pangulong Marcos Jr. at Prime Minister Sanae Takaichi tungkol sa kooperasyon ng Pilipinas at Japan sa larangan ng seguridad, maritime and defense, ekonomiya, energy resilience and decarbonization, at emerging and future-oriented sectors,” aniya.
“Inaasahan din na mag-uusap ang dalawang leaders tungkol sa mga regional and global issues na nakakaapekto sa Pilipinas at Japan gaya ng ASEAN, challenges sa Indo-Pacific Region, at developments in the Middle East,” dagdag pa niya.
