Nag-viral sa social media ang pagkamatay ng isang lalaking kilala bilang “Cobra King” sa lalawigan ng Samar matapos umano itong matuklaw ng sarili niyang alagang ahas.
Kinilala ang biktima sa pangalang “Danny,” na ayon sa mga ulat ay kilala sa kanilang komunidad sa pag-aalaga at paghawak ng mga makamandag na ahas, partikular ang mga cobra.
Sa mga kumakalat na impormasyon online, sinasabing nangyari ang insidente habang hawak niya ang ahas na kalaunan ay tumuklaw sa kaniya.
Batay sa mga detalyeng ibinahagi sa social media, pinaniniwalaang malakas ang kamandag ng ahas na tumuklaw sa biktima, dahilan upang mabilis na lumala ang kaniyang kondisyon. May mga ulat din na hindi na umano siya naisalba kahit pa may mga nagtangkang tumulong matapos ang insidente.
Ayon sa ilang netizen at residente na nagbahagi ng impormasyon, matagal nang kilala si Danny sa kanilang lugar bilang isang taong sanay umano sa paghawak ng mga ahas at iba pang mapanganib na hayop.
Lalaking tinakbuhan mga nanggugulpi sa kaniya, patay matapos bumangga sa poste!
Naglabasan din ang ilang larawan at video online na nagpapakita ng kanyang pakikisalamuha sa mga cobra, na lalong nagpatibay sa reputasyon niyang “Cobra King” sa kanilang lugar.
Sa kabila ng pagkalat ng balita, wala pang inilalabas na opisyal na ulat mula sa mga awtoridad ukol sa eksaktong detalye ng insidente, kabilang ang petsa, partikular na lugar, at agarang responde matapos siyang matuklaw.
Samantala, muling pinaalalahanan ng publiko ang panganib ng pag-aalaga ng mga makamandag na hayop, lalo na kung walang sapat na pasilidad, kaalaman, at access sa agarang lunas tulad ng anti-venom. Ipinunto rin ng ilan na kahit ang mga may karanasan sa paghawak ng ganitong hayop ay hindi ligtas sa posibleng aksidente.
Patuloy pa ring inaalam ang kabuuang detalye ng insidente habang kumakalat ang iba’t ibang bersyon ng kwento sa social media.
