Sumakabilang-buhay na sa edad na 44 ang indie film actress na si Sue Prado.
Habang hindi nabanggit ang dahilan ng pagkasawi, ang nakabibiglang ulat ay kinumpirma ng kapatid ni Sue na si May Shereen sa isang Facebook post noong Miyerkules, Abril 15.
“Our dearest Sue M. Prado has become a constant star in the night sky,” panimula ni May sa nasabing post.
“It is with profound pain that we share Sue’s passing. Sue brought light in anyone’s path throughout her life. A life lived for others, for the craft she nourished and for those who she loved most,” dagdag pa ng kapatid.
Sa kabila ng nakalulungkot na ulat na ito, muling balikan ang buhay-aktres ni Sue at ilan sa mga obrang kaniyang ambag sa industriya ng telebisyon at pelikula:
Tuklasin: Mga kulturang weirdo at kakaiba pero ipinagdiriwang pa rin sa mundo!
Ipinanganak bilang Marissa Sue Prado noong Mayo 18, 1981, si Sue ay nakilala sa kaniyang mga pagtatanghal sa Philippine New Wave Films tulad ng “Oro,” “Barber’s Tales,” “Area,” “Himpapawid,” “Thelma,” “Ilustrado,” at “Madrasta.”
Isa pa sa naging pinakakilalang proyektong kinabilangan ni Sue ay ang psychological drama na “Sabel” kung saan, gumanap siya bilang babae na mayroong dissociative identity disorder.
Bukod sa mga pelikula, naging parte rin ng mga TV series sa bansa si Sue tulad ng “FPJ’s Batang Quiapo,” “Gameboys,” “Abot Kamay na Pangarap,” “Prinsesa ng City Jail,” at “My Father’s Wife.”
Dahil sa angking galing sa pag-arte, si Sue ay nakapag-uwi ng samu’t saring parangal sa pag-arte.
Ilan dito ay ang mga sumusunod:
“Best Supporting Actress” sa Gawad Urian noong 2010 para sa “Himpapawid.”
“Best Actress” noong 2011 mula sa Sineng Pambansa para sa “In Banka Ha Ut Sin Duwa Sapah.”
“Achievement in Acting” noong 2016 sa Guam International Film Festival para sa “The Sister.”
“Best Actress” noong 2018 sa 5th Urduja Film Festival para sa “Caramel Child;” at “Best New Lead Actress” mula sa 7th Urduja Film Festival para naman sa “AlmaAta.”
