Sa kabila ng matagal nang paniniwala ng maraming Pilipino na hindi kanais-nais ang pangungutang, dumarami pa rin ang napipilitang humiram ng pera upang matugunan ang pangunahing pangangailangan, ayon sa pinakahuling ulat ng Bangko Sentral ng Pilipinas (BSP).
Ayon sa ulat ng Manila Bulletin, batay sa 2025 Consumer Finance and Inclusion Survey ng BSP, lumalabas na pito sa bawat sampung nasa hustong gulang ang naniniwalang hindi magandang ideya ang pagkuha ng loan. Gayunman, marami pa rin ang walang ibang opsyon kundi umutang upang makaraos sa araw-araw na gastusin.
Saklaw ng naturang pag-aaral ang tinatayang 75.6 milyong adult na Pilipino, at ipinakita rito na umaabot na sa 32% ng kabuuang paggamit ng loan sa bansa ang napupunta sa pagkain at iba pang batayang pangangailangan.
Ayon sa BSP, patuloy na umaasa ang maraming mamamayan sa pangungutang upang tustusan hindi lamang ang pagkain kundi pati na rin ang gastusin sa edukasyon at kalusugan.
Ipinakita rin ng datos ang lumalaking agwat sa pagitan ng mga nakakakontrol ng kanilang utang at ng mga nahuhulog sa mas mabigat na problemang pinansyal. Mahigit kalahati o 56% ng mga umutang ang nakakapagbayad nang maayos, habang 77% naman ang sumusunod sa itinakdang iskedyul ng pagbabayad o nakakapag-advance pa.
PNP, susunod sa kautusan ng DOJ na ipatupad arrest warrant ng ICC vs Sen. Bato
Gayunpaman, may malaking bilang pa rin ng mga nahihirapan. Tinatayang 34% ang nagsabing madalas silang kapusin sa pagbabayad, habang 8% ang umaaming kumukuha ng panibagong utang upang mabayaran ang naunang obligasyon—isang sitwasyong itinuturing na mapanganib na “debt trap.”
Bukod dito, napansin din ang pag-urong sa financial inclusion sa bansa. Bumaba sa 50% ang bilang ng mga adult na Pilipino na may pormal na financial account noong 2025, mula sa 56% noong 2021. Iniuugnay ito sa pagbaba ng mga account na konektado sa mga pautang mula sa microfinance institutions at mga kooperatiba.
Samantala, nananatiling marupok ang kakayahan ng maraming sambahayan na humarap sa biglaang krisis. Tinatayang isang-katlo lamang ng mga Pilipino ang may sapat na ipon o pondo na maaaring tumagal kung mawalan ng pinagkakakitaan.
Bagama’t halos kalahati ng populasyon ang nagsasabing kaya nilang tustusan ang kanilang pang-araw-araw na gastusin nang hindi umutang sa loob ng isang buwan sakaling mawalan ng trabaho, ipinapakita ng patuloy na pagdepende sa utang para sa pagkain, kalusugan, at edukasyon na marami ang nananatiling isang krisis lamang ang layo mula sa mas matinding suliraning pinansyal.
