Inaresto ng pulisya sa Japan ang isang stunt performer na dating kasali sa mga produksyon ng Super Sentai, ang seryeng naging inspirasyon ng Power Rangers, dahil sa umano’y pagkakasangkot sa sunod-sunod na mga pagnanakaw sa mga bahay.
Kinilala ang suspek na si Yasutomo Ihara na dinakip sa Saitama Prefecture kaugnay ng ilang insidente ng break-in sa mga residential property, ayon sa ulat ng Japanese media.
Batay sa imbestigasyon ng mga awtoridad, pinaniniwalaang sangkot si Ihara sa mahigit 40 kaso ng burglary. Tinatayang umabot sa humigit-kumulang 8.2 milyong yen ang kabuuang halaga ng mga ninakaw na gamit.
Ayon sa pulisya, kadalasang nagaganap ang mga insidente sa gabi kung saan pumapasok umano ang suspek sa mga bahay sa pamamagitan ng bintana sa ikalawang palapag o mga hindi naka-lock na pasukan.
Madalas ding halos walang nakikitang pinsala sa mga bahay na pinasok.
Emperor penguin, Antarctic fur seal 'endangered' na—IUCN
Pinaniniwalaan din ng mga imbestigador na maaaring ginamit ng suspek ang mga kasanayang natutunan nito bilang stunt performer—kabilang ang kakayahan sa pag-akyat, liksi, at balanse—upang makapasok sa mga bahay.
Iniulat na nagtrabaho si Ihara bilang stunt performer sa ilang Japanese tokusatsu productions, kabilang ang mga proyekto na may kaugnayan sa Super Sentai at Kamen Rider.
Naging kapansin-pansin ang kaso sa publiko dahil sa koneksyon ng suspek sa genre ng mga superhero show. Gayunman, nilinaw sa mga ulat na hindi siya pangunahing aktor sa Mighty Morphin Power Rangers.
