Isiniwalat ni Pangulong Ferdinand “Bongbong” Marcos Jr. na may sapat umanong suplay ng langis ang bansa, na aabot sa humigit-kumulang 50 hanggang 60 araw.
Ito ay matapos umugong ang agam-agam kaugnay sa posibleng epekto sa presyo at suplay ng petrolyo bunsod ng lumalalang tensyon sa pagitan ng ilang mga bansa sa rehiyon ng Gitnang Silangan.
Sa press briefing na isinagawa ni PBBM nitong Martes, Marso 3, tiniyak niya sa publiko na mayroong sapat na stockpile of oil ang bansa.
“First of all, let me assure everyone that we have [a] sufficient supply of oil. Mayroon tayong stockpile that are approximately fifty (50) to sixty (60) days in terms of gasoline, in terms of fuel oil, and in terms of kerosene,” saad ni PBBM.
“Let me just immediately allay the fears of everyone that our supply of oil derived products—even fertilizer—is something that we have to look at….” dagdag pa niya.
Saad pa ng Pangulo, ang ilang oil suppliers ng bansa ay mayroon ding sapat na stockpile ng naturang produkto—na maaaring pagkuhaan ng Pilipinas kung kakailanganin man.
“To further provide the supplies of these oil products, ‘yong ating mga pinagkukuhanan ng ating mga iba’t ibang oil products ay mayroon din silang stockpile. So, hindi pa ‘yon… hindi lalabas… hindi pa nila ine-export—so that is another potential supply for us,” anang Pangulo.
“However, we must be very clear that if you are a country that is holding a stockpile of all products, you will export as little of it as possible—so that you keep your own stockpile high while this crisis is going on,” aniya pa.
Ayon kay Department of Energy (DOE) Secretary Sharon Garin, dapat daw talagang asahan ang pagtaas ng presyo ng mga produktong petrolyo.
"Ang presyo talaga taas 'yan. I will not sugarcoat it. Sabihin mo na may oil na darating, tataas talaga dahil sa tensyon. The stress of the market will increase the price hanggang mag-stabilize 'yan. We need to expect that," saad ni Garin.
MAKI-BALITA: ‘We need to expect that!' DOE, kinumpirma posibilidad na pagratsada ng presyo ng produktong petrolyo-Balita
Samantala, ipinanawagan naman ni Mamamayang Liberal (ML) Party-list Rep. Atty. Leila de Lima ang pagsasabatas ng House Bill (HB) No. 8031, o ang “Fuel Subsidy Program Act,” na layong bigyan ng sapat na budget ang mga apektadong sektor ng nasabing isyu.
“Under our proposed House Bill (HB) No. 8031 or the ‘Fuel Subsidy Program Act,’ we aim to provide a monthly fuel subsidy of not less than P7,000 to them and other low-income sectors,” ani De Lima.
MAKI-BALITA: De Lima, ipinapanukala 'fuel subsidy' para sa nakaambang epekto ng US-Israel, Iran war-Balita
Vincent Gutierrez/BALITA
