Inaasahang anim na planeta ang makikita sa kalangitan sa darating na Sabado, Pebrero 28, ayon sa National Aeronautics and Space Administration (NASA).
Ang mga nasabing planeta na ito ay ang Mercury, Venus, Neptune, Saturn, Uranus, at Jupiter, na inaasahang makita paglubog ng araw.
Ayon pa sa NASA, ang apat sa mga planetang ito ay malinaw na makikita nang walang equipment habang ang mga planetang Uranus at Neptune ay makikita lamang gamit ang equipment tulad ng binokulo o telescope.
Ibinahagi rin ng NASA na ang susunod na planetary parade ay mamamataan na sa Oktubre 2028, kung saan, limang planeta naman ang makikita sa kalangitan bago sumikat ang araw.
#BalitaExclusives: Mister na nag-iwan ng lisensya para pambili ng gamot ng misis, inulan ng tulong!
Dahil ito ay bihira kung maituturing ng astronomers, pinaniniwalaan ito sa sinaunang kasaysayan bilang senyales na may paparating na trahedya sa mundo.
Ayon sa pag-aaral ng University of Rochester, pinaniniwalaan ng mga Europeo noong Medieval Times na ang pagkakapantay ng mga planeta, partikular ang Jupiter at Saturn, ay senyales ng kagutuman, lindol, matinding pagbaha, at pagbagsak ng mga pamumuno, lalo na kung may kasabay itong eclipse.
Ang mga mahiwagang paniniwala na ito ay nakikitang posibleng nagmula sa pagkamangha ng mga tao sa celestial bodies noon pa mang mga nagdaang kasaysayan.
Gayunpaman, ipinaliwanag ng siyensiya na walang pisikal epekto ang magaganap na planetary parade, bagkus, ito ay isang celestial event kung saan iba’t ibang planeta ang makikita nang malapit sa mundo, na tinatawag din bilang “conjunction.”
Nagsisilbi rin itong paalala na ang solar system na kinabibilangan ng Earth, ay dynamic at nagsisilbi itong tulay sa pagkamangha ng mga sinauna at modernong siyentipiko sa malawak at misteryosong pangkalawakan.
Sean Antonio/BALITA
