Kinumpirma ng Bureau of Immigration (BI) ang pagdating sa bansa ni dating Department of Public Works and Highways Secretary Manuel Bonoan matapos niyang lumapag sa Ninoy Aquino International Airport nitong Linggo ng umaga, Enero 18, 2026.
Ayon sa BI, dumating si Bonoan sakay ng China Airlines flight CI0701 mula Taipei.
Agad siyang isinailalim sa Immigration Lookout Bulletin Order (ILBO), alinsunod sa direktiba ng Department of Justice kaugnay ng patuloy na imbestigasyon sa umano’y iregularidad sa mga flood control at tinaguriang “ghost” projects.
Batay sa talaan ng BI, umalis ng bansa si Bonoan noong nakaraang taon upang samahan ang kanyang asawa sa Estados Unidos para sa isang medikal na pamamaraan. Sa kanyang pagbabalik, wala siyang iniulat na kasamang biyahero.
Sen. Kiko, reunite kay Mayor Leni; isusulong Sagip Saka act sa Naga!
Ipinaliwanag ng BI na ang ILBO ay hindi katumbas ng travel ban, kundi isang mekanismo upang masiguro na agad na naipapaalam sa mga awtoridad ang pagdating o pag-alis ng mga indibiduwal na may kaugnayan sa mga kasalukuyang imbestigasyon.
Sinabi ni BI Commissioner Joel Anthony Viado na kaagad nilang ipinarating ang impormasyon sa Kalihim ng Katarungan, alinsunod sa umiiral na mga patakaran at proseso ng ahensya.
Patuloy naman ang koordinasyon ng BI sa DOJ habang nagpapatuloy ang pagsisiyasat.
