Magkakasabay na nawala ang 27 alagang baka mula sa Barangay Sengal, Lamitan, Basilan kung saan tatlo sa mga ito ang kumpirmadong kinatay noong madaling-araw ng Sabado, Enero 10, 2026.
Ang mga bakang nawawala ay pagmamay-ari ni Basil Sarabil, residente ng Barangay Sengal, na nadiskubre ang insidente bandang madaling-araw nang puntahan niya ang kaniyang mga alaga.
Ayon kay Sarabil, tatlo sa mga baka ang kinatay at tanging mga lamang-loob na lamang ang naiwan sa lugar, habang 22 ang tuluyang nawawala. Dalawa namang baka ang natagpuang buhay at nanginginain sa isang kalapit na pastulan.
Kalaunan ng araw, may mga karagdagang bahagi ng katawan ng baka na natagpuan sa iba pang bahagi ng karatig-barangay sa Barangay Limook, na pinaniniwalaang mula sa mga nawawalang baka.
MMDA, dinepensahan traffic enforcer na pinagbintangang nagtatago sa kalsada
Ayon sa mga opisyal ng barangay at pulisya na nagsagawa ng inspeksiyon, ang paraan ng pagkakatagpo sa mga labi ay nagpapahiwatig ng organisadong cattle rustling at ilegal na pagkatay.
Agad na humingi ng tulong si Sarabil sa mga opisyal ng Barangay Limook at sa Lamitan City Police, na nagsagawa ng pinagsamang imbestigasyon at search operation. Tinutukoy na ngayon ng mga awtoridad ang mga posibleng salarin, ang rutang dinaanan sa pagdadala ng mga baka, at ang posibleng kinaroroonan ng mga nawawalang hayop.
Nanawagan din ang pulisya sa publiko na iulat ang anumang kahina-hinalang galaw ng mga hayop, pagbebenta ng karne, o impormasyong makatutulong sa ikaaaresto ng mga responsable.
Sa ngayon, 22 baka ang nananatiling nawawala habang patuloy ang imbestigasyon.
