Kahit bata man o matanda, tila walang pinipiling edad ang mga nagnanais na makatanggap ng Aguinaldo sa tuwing sumasapit ang Kapaskuhan.
Kaya naman ilang araw bago sumapit ang Pasko, narito ang ilang hakbang upang matukoy kung ang perang natanggap mo ay peke o tunay.
Ayon sa BSP, madalas samantalahin ng mga gumagawa ng pekeng pera ang panahon ng Pasko dahil sa dami ng transaksiyon at pagmamadali ng mga tao. Kaya naman, paulit-ulit ang panawagan ng bangko sentral na sundin ang simpleng paraan ng pagkilala sa tunay na salapi—ang “Feel, Look, Tilt”.
Feel (Haplosin)Ipinapayo ng BSP na damhin muna ang papel ng pera. Ang tunay na banknote ay may kakaibang tekstura—hindi masyadong makinis o madulas. Ramdam din ang nakaangat na imprenta, lalo na sa larawan, serial number, at sa mga titik na “Bangko Sentral ng Pilipinas.”
Walang basehan!' Solon, itinangging may parte sa 2026 nat'l budget ang impeachment para kay VP Sara
Look (Tingnan)Kapag itinaas sa liwanag, makikita sa tunay na pera ang malinaw na watermark na kapareho ng mukha sa harap ng banknote. Dapat ding lumitaw ang security thread o manipis na guhit na nakabaon sa papel, na may malinaw na mga titik at numero. Ayon sa BSP, malabo o putol-putol ang mga elementong ito sa pekeng pera.
Tilt (I-tilt o ikiling)Sa pagkiling ng pera, kapansin-pansin ang pagbabago ng kulay ng ilang security feature, gaya ng optical variable ink at hologram. Ang mga numerong kumikislap at nagpapalit ng kulay ay palatandaan ng tunay na banknote.
Dagdag pa ng BSP, mahalagang suriin ang serial numbers—dapat malinaw, pantay ang pagitan, at pare-pareho ang font. Ang mga malabong numero o hindi tugma ang disenyo ay posibleng senyales ng pamemeke.
Para sa mga magulang, hinihikayat din ng BSP na turuan ang mga bata kung paano kilalanin ang tunay na pera, lalo na’t sila ang madalas tumatanggap ng aguinaldo tuwing Pasko.
“Ang kaalaman ay unang depensa laban sa pekeng salapi,” ayon sa bangko sentral sa mga naunang paalala nito.
Sa huli, paalala ng BSP na ang sinumang makakatanggap ng hinihinalang pekeng pera ay huwag itong ipakalat. Sa halip, agad itong dalhin sa pinakamalapit na bangko o tanggapan ng BSP para sa tamang pagsusuri.
Ngayong Kapaskuhan, habang masaya ang pamimigay ng aguinaldo, mas mainam na siguraduhing ang ibinibigay at tinatanggap ay tunay—upang ang saya ng Pasko ay hindi mapalitan ng abala at problema.
