Patuloy ang pagratsada ng team Pilipinas na kasalukuyang nasa ika-5 puwesto sa medal standings ng 33rd Southeast Asian Games 2025 na ginaganap sa Bangkok at Chonburi, Thailand.
Ayon sa tala ng Philippine Olympic Committee na huling inilathala noong Disyembre 11, 2025, nakapagtala ng kabuuang 33 medalya – 5 ginto, 7 pilak, at 21 bronze ang team Pilipinas.
Ang team Pilipinas ay binubuo ng 1,100 atleta na lumalahok sa 50 sports, kung saan ang ilan sa kanila ay nauna nang sumungkit ng mga medalya at ang iba naman ay bigong makapagkamit ng podium finish.
Mga atleta at sports category na bumingwit ng medalya para sa Pilipinas:
Another gold! Hidilyn Diaz, isa nang guro sa UP Diliman
Justin Kobe Macario- ang naghatid ng unang gintong medalya para sa Pilipinas sa taekwondo (men’s individual freestyle poomsae) matapos makakuha ng pinakamataas na puntos laban sa mga kalaban.
Ang pambansang women’s 4x100m freestyle relay team na binubuo nina Kayla Sanchez, Heather White, Chloe Isleta, at Xiandi Chua na nagtamo ng gintong medalya sa swimming event – ito ang unang pagkakataon na nanalo ang Pilipinas sa kategoryang ito.
Aleah Finnegan naman ay nag-uwi ng isa pang gintong medalya sa gymnastics vault event.
Sa jiu-jitsu, nagpakitang-gilas sina Kimberly Custodio at Dean Roxas, na parehong nanguna sa kani-kaniyang kategorya at nagdala rin ng mga medalya para sa bansa.
Marami ring bronze medal ang nakuha sa iba’t-ibang sports gaya ng mountain biking, ju-jitsu, gymnastics, at grupo ng chess team bilang kontribusyon sa kabuuang medal tally ng Pilipinas.
Samantala, sa kabila ng magandang simula, ang Gilas Pilipinas 3x3 men’s basketball team ay hindi nakakuha ng medalya—ito ang unang beses sa kasaysayan simula ng inclusion ng 3x3 sa SEA Games, matapos matalo sa Malaysia sa bronze medal match.
Ang ilang koponan at atleta ay hindi nakasungkit ng medalya sa semifinal o final rounds, kabilang ang ilang laban sa athletics at team sports na hindi nauwi sa podium finish.
Pagtataya at Susunod na Aksyon
Ayon sa Philippine Sports Commission, inaasahang patuloy na lalago ang medal haul ng Pilipinas habang lumalapit ang huling araw ng torneo sa Disyembre 20.
May mga inaasahang medal events pa sa boxing, athletics, swimming, at team sports na posibleng madagdagan pa ang ranggo ng bansa sa medal standings.
