Himalang nakaligtas ang isang lalaking nagpalutang-lutang sa dagat sa loob ng tatlong araw bunsod ng bagyong Tino.
Nasagip ang biktima na si alyas “Christian,” 33 taong gulang at residente ng Sitio Buswang, Barangay Cantood sa Balamban, matapos tangayin ng agos at magpalutang-lutang sa dagat sa loob ng tatlong araw at dalawang gabi. Natagpuan siya ng isang mangingisda sa San Remigio, humigit-kumulang 80 kilometro ang layo, ayon sa mga awtoridad.
Batay sa ulat ng mga awtoridad, tinangay si Christian ng rumaragasang baha nang wasakin ng bagyo ang kanilang tahanan sa Balamban. Kumapit umano siya sa isang troso ng punong saging upang makalutang sa gitna ng malalakas na alon at hangin.
Agad siyang dinala sa San Remigio Rural Health Unit para sa agarang gamutan matapos mailigtas. Nakipag-ugnayan naman ang lokal na pamahalaan ng San Remigio sa pamilya ni Christian, na tatlong araw nang naghahanap sa kanya mula nang manalasa ang bagyo.
‘Di nakakuha ng definite commitment!’ Makabayan Bloc, naipasa na 2nd impeachment complaint kay PBBM
Pinuri ng mga opisyal ang mabilis na aksyon ng mangingisda sa gitna ng malawakang pinsala at pagdadalamhati.
Ayon sa mga opisyal, ang pagkakaligtas ni Christian ay sumisimbolo ng katatagan at pananampalataya sa gitna ng matinding hagupit ng kalikasan.
