Inalis bilang military reservist si Cavite 4th District Rep. Kiko Barzaga dahil umano sa kaniyang social media post laban sa militar, ayon sa Philippine Army nitong Miyerkules, Oktubre 22, 2025.

Ayon kay Army 7th Infantry Division Commander Maj. Gen. Andrew Dema-ala, ang rekomendasyong alisin si Barzaga bilang reservist ay tugon sa mga pahayag at komento ng kongresista sa social media, kung saan umano’y iginigiit nito na sasali ang Armed Forces of the Philippines (AFP), Philippine National Police (PNP), at mga reservist sa nakatakdang protesta noong Setyembre 21, 2025, at mawawalan ng tiwala ang AFP sa pangulo.

Ayon kay Dema-ala sa mga mamamahayag, sinabi niyang epektibo ang delistment ni Barzaga mula sa reserve force simula Setyembre 21.

“Representative Kiko Barzaga was delisted over the release of his statements on social media, as he was insinuating sedition with an attached photo of him in military uniform,” ani Dema-ala sa GMA News Online.

Sen. Bato, masayang nakita ang apo

Dagdag pa niya, “Such statements endanger the Armed Forces' position as a non-partisan organization.”

Saad pa ni Dema-ala, ibinahagi raw kasi ni Barzaga ang mga pahayag kasama ang kaniyang larawang nakasuot pa ng military uniform.

Aniya, “Per investigation, lumalabas na 21 September niya na-commit yung offense by posting yung picture nya in military uniform while insinuating seditious statements that is why yun ang effectivity ng kanyang delistment.”

Bunsod nito, hindi na raw maaari pang muling makasali sa AFP Regular at Reserve Reforce si Barzaga kahit na kailan. 

“We do not condone violations of military regulations, regardless of status or position, as part of our duty to preserve the professionalism and credibility of the organization,” saad ni Dema-ala.

Giit pa niya, “We emphasize that this administrative action does not reflect on the personal character or public service record of Rep. Barzaga.”