Naglabas ng pahayag si Department of Public Works and Highways (DPWH) Sec. Vince Dizon kaugnay sa nasabi ni Batangas 1st District Rep. Leandro Leviste na may “koneksyon” umano si DPWH Usec. Arrey Perez sa mga kontratista sa maanomalyang flood-control projects.
Ayon sa isinagawang press conference Dizon nitong Biyernes, Oktubre 17, 2025, sinabi niyang agad niya umanong kinausap si Perez tungkol sa balitang may kaugnayan siya sa mga kontratista.
“Immediately, no’ng nalaman ko ‘yon at may pinangalan si Congressman Leandro Leviste… kaya kinausap ko agad-agad si Under Secretary Arrey Perez,” saad ni Dizon.
“Sinabi ko sa kaniya na ‘ni-named ka ni Congressman Leviste… may mga narinig siya o binabase rin niya sa mga dating balita,’” pagbabahagi pa niya.
Sen. Bato, masayang nakita ang apo
Pagpapatuloy pa ni Dizon, sinabi niyang iimbestigahan umano nila ang isyu ni Perez upang sundin ang utos ni Pangulong Ferdinand “Bongbong” Marcos, Jr., na linisin ang kanilang ahensya.
“Ang sabi ko, iimbestigahan natin ito kasi ‘yon ang kabilin-bilinan ng Pangulo sa atin na kailangang linisin natin ang DPWH,” anang secretary.
“At ang paglilinis ay walang sinisino, walang sinasanto[...]” pagdidiin pa niya.
Kinumpirma naman ni Dizon na nag-abot na ng resignation letter si Perez sa kaniya at tinanggap na umano niya iyon.
“Ang sinabi niya sa akin, unang una, wini-welcome niya ‘yon. Pero ayaw niyang makasagabal at ayaw niyang maging distraction ito dahil alam niyang napakabigat ng kailangan nating gawin,” ika niya.
“Siya ay nag-tender ng irrevocable resignation at ito syempre ay tinanggap ko na,” pagkukuwento pa ni Dizon.
Nilinaw naman ni Dizon na hindi na parte ng DPWH si Perez ngunit itutuloy pa rin nila ang imbestigasyong nauugnay sa kaniya.
“As of today, hindi na po parte si Under Secretary Perez sa DPWH. Siya mismo ay nagkusa at nirerespeto natin ‘yong desisyon niya pero syempre, ‘yong imbestigasyon,” pagkukumpirma niya.
“Hindi porket nag-resign, e, hindi natin iimbestigahan. Lahat ‘yan, kailangang imbestigahan at ‘yan ang gagawin natin,” ayon pa kay Dizon.
Ani Dizon, susundin umano nila ang trabaho ibinigay sa kanila ng Pangulo na walang sisinuhin at sasantuhin.
“Kasi ‘yan ang trabaho na ibinigay sa atin ng Pangulo na wala tayong sisinuhin, wala tayong sasantuhin, at kailangang linisin natin ang DPWH,” pagtatapos pa ni Dizon.
Mc Vincent Mirabuna/Balita
